Көтелмәгән нәтиҗәләр дә бар: көрәш буенча Россия чемпионаты тәмамланды

60 кг.га кадәр үлчәүдә Ульян өлкәсеннән Рөстәм Фәтхуллин белән Татарстан егете Илфат Миннегалиев очрашты. Баштагы мәлләрдә "алым бәяләнми" дигән сүзләр генә әйтелде, аннан Рөстәмгә кисәтү бирелде. Ахыр чиктә, Илфат җиңде.

65 кг.да Атказанган спорт остасы Илнар Закиров белән Төмәннән Крапива фамилияле егет көрәште. Илнар җиңел отты.

70тә  "классика жанра": Ульяннан Артур Хәкимов белән татарстанлы Ислам Фәлахов. Соңгы елда берничә тапкыр очраштылар. Ислам инде дөнья күләмендә күп тапкырлар танылган батыр, Артур танылып килүче спортчы. "Зилант" өчен көрәшүе, Ульянда да "Зилант"ның филиалын ачу үз эшен эшләде. Бу юлы Артур тагын да чарланган: берничә тапкыр алым да эшләп карады, балл да яулады, Ислам кебек чистага атучы спортчының алымнарыннан да качарга омтылды. Ахырга таба Исламны берничә тапкыр җәрәхәт алырга да мәҗбүр итте. Ахыр чиктә, барысын да шаккаттырып, Ислам кадәр Исламны җиңүгә дә иреште. 

Сүз уңаеннан, захватлар буенча тәҗрибә үзен әйбәт кенә күрсәтте, Татарстан ярышларында гына түгел, илкүләм бәйгеләрдә куллану үзен аклады. Захват өчен артык көрәш күренми башлады.

Калининградтан Глубокий фамилияле белән Оренбургтан Рафаэль Бильданов көрәшкәндә дә фаворит билгеле иде - беренче әйләнештә үк Рамил Синәкәевны җиңгән Бильданов. Әллә көндәше артык «тирән» булды, әллә Синәкәевны откач, барысын да җиңел генә җиңәрмен дип уйладымы – очрашу шактыйга сузылды әле. Рафаэль – чемпион!

80 килограммда татарстанлы Рафаэль Кәлимуллин белән Киров өлкәсеннән Хәсән Әсхәдуллин көрәшендә Рафаэль  эшне озакка сузмаска тырышты. Шулай булып чыкты да, очколар буенча чиста җиңүгә иреште Рафаэль.

85 кг.да финалда Атказанган спорт остасы Ренас Кәлимуллин һәм Самарадан Кәрим Рузметов очрашты. Ренас – чиста җиңү!

Төмәнле Даниил Маркуш һәм Татарстан батыры Азат Габдрәшитов очрашуында Азат та озакка сузмады һәм җиңү яулап, чемпион исемен яулады.

100 кг.да Булат Мусин Мәскәү өлкәсеннән Вышинский белән көрәштә чиста җиңү яулады. Артык комментарийлар да кирәк булмады бу очрашуларда.

Радик Сәлахов – Айнур Сыртаев. Айнурга авыр, әлбәттә, чөнки ул Татарстан ярышларында Чистай командасы өчен 115 кг.да көрәшә. Ә монда 130 кг., җитмәсә, Радик Сәлахов үзе. Радик көндәшенә мөмкинлек калдырмады.

Ранис Гыйләҗетдинов Төмән өлкәсеннән Салават Абдуллин белән очрашты. Көрәштән бераз ял итеп алган Ранис беренче алым белән чиста җиңү яулады.