Медальләр “яңгыры” астында узган көрәш бәйгесе

Февраль аендагы бер-бер артлы килгән җиңүләребезне районыбызның спорт “министры” Рөстәм Заһидуллин медальләр “яңгыры” белән тиңләде. Чыннан да, республика күләмендә узган ярышлардан алган җиңүләребезгә рухланып, районыбызда Алмаз Нотфуллин истәлегенә узучы ярышларнын да шундый рухта узуына әле дә күңел ышанып бетми.

Инде соңгы вакытта күпмедер сынатып, югалткан позициябезне 2024 ел нәтиҗәләре белән кире кайтару үзе генә дә ни тора. Башкалабызда узган “Ватаным Татарстан” газетасы гамәлгә куйган герой-шагыйрь Муса Җәлил истәлегенә узучы гаять дәрәҗәле ярышта районыбыз башлыгы Рамил Нотфуллинга тапшырылган 250 меңлек сертификат, балаларны көрәш серләренә төшендеруче Ринат Хәйретдиновның “Иң яхшы тренер”, көрәшне пропагандалаучы Нурзада Сәмигуллинның “Иң актив журналист” исемнәренә лаек булып сәхнәгә күтәрелүләре районыбызны янә республикабызның спорт күгендә якты йолдыз булып яндырды. Шундый рухта кайтып, ничек ярышыбыз начар узсын инде ул.

Салавыч авылы ул көнне мәш килде. Спортзалыбыз да бал корты гөжләгән күк гөжләде. Аның өстенә көрәшебезгә “ТНВ” телевидениесе вәкилләренең килеп керүе бөтенләй дә әллә нәрсә булды. Смәелнең җиңелү белмәс кечкенә батыры Рүзәл Галимуллин аларның үз кунагына әйләнеп тә бетте бугай инде. Бу юлы да ул телевидениегә Бөрбаштан якын дусты – икенче батырыбыз Билал Галимуллин белән интервью да биреп куйдылар. Менә бит ничек булдырабыз!

Аннан, дәрәҗәле көрәшчеләребез - район башкарма комитет җитәкчесе, атказанган спорт остасы, дөнья чемпионы Айдар Хәйретдиновның, РСФСРның спорт остасы алып батырыбыз Рафис Насыйбуллинның үгет-нәсыйхәтләре генә дә яшь батырларыбызга күпме рух өстәгәндер әле. Искиткеч, югары “нотада” узды, бәйгебез. Рәхмәт инде мәрхум Алмазыбызның уллары Илназга, бигрәк тә Искәндәргә, Ильяска, абыйлары Рамил Рәшит улына, “Татарстан” җәмгыяте рәисе Айнур Рамил улына, җирлек башлыгы Расим Латыйповка, туганнары Марсель Йосыповка, Ленар Әхмәтовка, федерация рәисе Фәнис Шәриповка, барлык хөкемдарларга, спорт мәктәбенә. Аларның ярдәме булмаса, ярышыбыз андый ук дәрәҗәдә уза да алмас иде әле.

Без бит инде күп көрәшче җыеп ярыш уздырырга өйрәнгән кешеләр. Шунлыктан, ярыш барышында тамашачыларның нигә бу ярышта 72 генә көрәшче микән дигән сорауларына дә җавап бирергә туры килде. Алда торган Татарстан беренчелегенә сайлап алу ярышлары булганлыктан, якын күрше-тирәләрне чакырмадык бу юлы. Тырыша инде Салавычта тренерлык итүче Алмаз Рәшит улы да. Ярыш саен уз нәниләрен җыеп, күрсәтмә чыгыш кебек аерым көрәштереп, аларда татар көрәшенә мәхәббәт тәрбияләргә тырыша. Бу юлы да 30 килограмм авырлыктагы 3 сабыен көрәштереп, ярышыбызга аерым төсмер бирде. Кунакка кайткан олы кунагыбыз Татарстанның атказанган экологы заманында үзе дә бил алышкан, бу ярышта улы Азаматны бил алыштыручы Фаяз Шакиров та ярыштан күтәренке рух белән кайтып китте.

Балаларыбызга Мамадышта узучы ярышларда җиңүләр генә юлдаш булсын инде.

Менә алар, безнең җиңүчеләребез:

36 кг.да-Азат Галимов/Арбор/,Риназ Сабиров/Балтач/, Наил Сафиуллин/Пыжмара/, Йосыф Ризванов/Балтач/.

40 кг.да- Рүзәл Камалов/Бөрбаш/, Инзил Камалов/Балтач/, Хәлил Леонтьев/Чепья/, Әмир Сәләхиев/Норма/.

45 кг.да-Рүзәл Галимуллин/Смәел/, Ислам Галиев/Балтач/, Гадел Хөсәеноа/в/Бөрбаш/, Ильяс Нәбиев/Смәел/.

50 кг.да-Азамат Шакиров/Смәел/, Ирек Бикбов/Чепья/, Илдан Батыршин/Смәел/, Даниял Хөснетдинов/Салавыч/.

55 кг.да- Денис Яковлев/Урта Көшкәт/, Данияр Маннапов/Салавыч/, Билал Галимуллин, Сөләйман Галимов/икесе дә Бөрбаштан/.

60 кг.да-Әхәт Әскәров/Арбор/, Азамат Шакиров/Казан/, Тимур Конкин/Чепья/, Денис Гайсин/Пыжмара/.

65 кг.да- Фидан Гарифуллин/Түнтәр/, Айнур Галиев/Шеңшеңәр/, Нургиз Нәҗипов/Салавыч/, Гадел Галимбеков/Бөрбаш/.

70 кг.да- Алмаз Хәйретдинов/Балтач/, Әнәс Мифтахәв/Арбор/, Айнур Садретдинов//Норма/.

75 кгюда- Раяз Нәбиев/Балтач/, Раяз Хәбибуллин/Норма/, Раил Галәлетдинов/Карадуган/, Рәсүл Гыймадиев/Бөрбаш/.

80 кг.да- Нияз Сәләхиев/Норма/, Әсхәт Габделхәев/Балтач/, Риназ Заһидуллин/Салавыч/.

100 кг.да-Ильяс Биккинин/Карадуган/, Рияз Заһидуллин/Салавыч/.

Авыр үлчәүдә- Тимур Әхмәтханов/Карадуган/, Илназ Гарифуллин/Шеңшеңәр/, Ильмир Гарифуллин/Норма/, Раяз Габдуллин/Салавыч/.

Нурзада Сәмигуллин.Балтач бистәсе.