“Рамазан аенда шайтаннар отпускада”

Чарага министрлар, консуллар, түрәләр, депутатлар һәм җәмәгать эшлеклеләре чакырылган иде. Төп кунакларның берсе - Россия мөселманнары Үзәк Диния нәзарәте рәисе Тәлгать Таҗетдин иде.
Ифтарга җыелучыларны Татарстан мөфтие Камил хәзрәт Сәмигуллин сәламләде.
- Рамазан аенда җәннәт капкалары ачыла, ә җәһәннәм капкалары ябыла, шайтаннар чылбырга бәйләнә һәм ураза тоту күпкә җиңел була. Икенче төрле әйткәндә, бу айда шайтаннар отпускада. Шәүвәл аендагы уразаны тотканда аның шулай икәнен беләбез, ул айда ураза тоту чынлап та авыррак. Рамазан ае ул – мәдрәсә. Шуннан без бер тамчы су белән бер кисәк икмәкнең кадерен белергә өйрәнәбез. Сәхәр вакытында иртәнге намазга торып булуын аңлыйбыз. Уразада килеш нәфесебезгә каршы көрәшергә үзебездә көч таба алуыбызны беләбез. Ифтар вакытында төгәл кешегә әйләнәбез, чөнки ифтарның сәгать ничәдә икәнен һәркем белә. Ай дәвамында Коръән укып, бер генә сәгать булса да смартфонсыз һәм социаль челтәрләрсез дә яшәп булуына да инанабыз.  Болар барысы да – мәдрәсә. Барыбызга да изге айны лаеклы рәвештә узарга насыйп булсын, - диде ул.

“Туган авылым” комплексы җитәкчеләренең берсе Радик Абдрахманов республикада ифтарлар уздыруның киң тарала баруын ассызыклап үтте. “Алда безне әле күп кеше катнашында республикакүләм ифтар һәм Fashion Iftar көтә. “Туган авылым” комплексында да һәр көнне 300 кеше өчен ифтар оештырылачак. Дүшәмбедән рамазан чатыры ачылачак” диде ул.