Каникул ике көнгә озайтылдымы? 

Бердән, урамда чынлап та салкын. Икенчедән, пандемия безне башкача да укырга өйрәтте. Бүген иртәннән башлап, зоом мәйданчыгында укулар башланды, чөнки кайбер мәгариф оешмалары укучылар белән дистанцион эшләү режимын сайлады.

Бер үк  вакытта мәгариф министрлыгы һава торышының тотрыксыз булуына карамастан, мәктәпләр балаларны кабул итәчәк, дип белдерде. Бу, бигрәк тә, балалар белән өйдә калырлык кеше булмаса, мәктәптә аларны каршы алачаклар дигән сүз.
– Бала белән педагоглар шөгыльләнәчәк, мәктәптә балага кайнар ризык ашатачаклар. Термометрлар нинди температура күрсәтүенә карамастан, Татарстан мәктәпләре һәм педагоглар коллективлары тулы составта элеккеге режимда эшли, – дип хәбәр ителә Татарстан Мәгариф һәм фән министрлыгының матбугат хезмәтендә.

Мәгариф оешмаларында температура режимы барлык нормаларга һәм таләпләргә туры килә. Министрлыкта шулай ук нинди һава шартларында дәресләр кичектерелергә мөмкин булуы турында да искәрттеләр.

Аерым алганда, авыл мәктәпләренең башлангыч сыйныфларында дәресләр һава температурасы -23 градус, ә шәһәр мәктәпләрендә башлангыч һәм авыл мәктәпләрендә 5-9 сыйныф укучылары һава температурасы -25 градус булганда, шулай ук шәһәр мәктәпләрендә 5-9 сыйныф укучылары өчен -27 градус булганда кичектерелергә мөмкин. 10-11 сыйныфта укучылар өчен дәресләр -30 градус булганда авыл мәктәпләрендә, ә шәһәрдә -32 градус булганда кичектерелә ала.

Моннан тыш, кышкы чорда ачык һавада физкультура буенча дәресләр, санитария нормалары һәм кагыйдәләре нигезендә, кече сыйныф укучылары өчен бары тик һава температурасы өч градустан да түбәнрәк булмаган салкында һәм җил тизлеге секундына 6-10 метрдан да ким булмаган очракта гына рөхсәт ителә.

Югары сыйныф укучылары өчен шулай ук җил тизлеге секундына 6-10 метрдан да ким булмаган һәм 10 градустан да түбәнрәк булмаган салкында гына рөхсәт бирелә.

Шул ук вакытта ТР Мәгариф һәм фән министрлыгы балаларны мәктәп автобуслары белән йөртүне һәм, тышкы һава температурасы –25 градус һәм аннан да түбәнрәк булган хәлдә, муниципаль берәмлекләрдән читкә чыгуны туктатырга киңәш итә. Мәгариф оешмалары җитәкчеләренә көчле салкыннар чорында шулай ук җылылык белән тәэмин итү системаларының эшенә контрольне көчәйтергә тәкъдим ителә.