Студентлар Конгрессы узды, проблемалар калды

Конгресста төп чыгышларда студентлар фәне, тулай тораклар, шәһәр транспортында студентлар тарифын булдыру, студент үзидарәләре буенча карарлар чыгару кебек мәсьәләләр күтәрелде. Шулар буенча резолюция әзерләнде. Болар республикадагы һәрбер югары һәм һөнәри белем бирүче уку йортларына кагылышлы проблемалар иде. 

Билгеле булганча, бездә күп кенә тулай тораклар совет чорында ук төзелгән. Аларның күбесенә капиталь ремонт ясалмаган. Заманча шартлар тудыру өчен аларны төзекләндерергә, я яңаны салырга кирәк. Бездә 70 меңнән артык студент чит җирдән килеп укуын дәвам итә. Ә алар өчен вузларда 21 меңгә якын, ә һөнәри училище-техникумнарда 4500 урын әзерләнгән. Шуңа да яшьләр арасында фатир яллап торулар арта.

Студент тарифына килгәндә, бу мәсьәлә тиз генә хәл ителмәс кебек. Бердән, бюджеттан транспорт өчен махсус акча бүленә. Ул студентлар арасында грант  формасында аерым студентларга бирелә. Адреслы ярдәмнең күләме 60 миллионга  якын. Ә шул ук вакытта студентлар таләп иткән тарифлар аларның транспортка булган чыгымнарын икеләтә киметер иде, аннан исә бөтен укучылар да файдалана алыр иде. 

Депутат Марат Бариев студентларга яшьләр сәясәте буенча эшләнгән законга таянып тәкъдимнәрен кертергә, кайберсен Россия күләмендә дә күтәрергә кирәклеген билгеләп үтте. Шул ук вакытта ул конгрессста туган телләр  һәм халыклар дуслыгы елы буенча бернинди фикер яңгырамавына да игътибар итте.