Əнвәр Нургалиев: «Айсылуның хәлен сорашып торасыз, рәхмәт!»

Без бу хакта узган елны сайтыбызда язган идек. Əлеге кыз баланы Нургалиевлар бик якын иткән. Бик акыллы, әдәпле, тәрбияле бала, ди алар аның турында. Әлеге коточкыч хәбәр кызның гаиләсе өчен генә түгел, алар өчен дә бик авыр булган.

Җырчы ничек тә ярдәм итергә теләп, социаль челтәрдә дә хәйрия акцияләре уздырды, хәйрия концерты да куйды. Кыскасы, кулыннан килгәнчә ярдәм итте. Шушы көннәрдә, Уфада узган концертына Айсылу әти-әнисе белән Әнвәрнең концертына килгән. Бу хакта җырчы үзенең Инстаграмында: "Бүген концерт кую аеруча куанычлы булды. Әле Айсылу буш кул белән килмәгән, үз куллары белән чиккән портретымны да бүләк итте. Аның хәлен һәрвакыт сорашып торасыз. Битараф булмаганыгыз өчен рәхмәт", - дип язган.

Узган елны Әнвәр Нургалиев интервью биргәндә болай сөйләгән иде: "Айсылу әле хастаханәдә ята, 2 «химия» эшләтте. Оптимистик рух саклап кала, көрәшә һәм җиңеп чыгачакмын ди. Чәчләре коелды, ябыкты... Əмма бу вакытлыча гына. Бар да әйбәт булачак, Алла боерса!
Күптән түгел Уфада хәйрия концерты узды. Кызганыч, зал тулып бетмәде, тик шулай да күпмедер акча җыелды. Тик яман шеш турында сүз барганда, 1-2 миллион акча бөтенләй дә акча түгел. Айсылу очрагыгында сөяк миен күчереп утырту ярдәм итәчәк.

Без - кулдан килгәнчә ярдәм итәчәкбез. Афәтле яңалыкны ишетү белән улым җитди ир-атка әйләнде, көн-төн борчыла. Ирина белән мин дә тынычлана алмыйбыз".

Айсылуга сәламәтлек теләп калабыз! Синең белән бар да яхшы булсын, матуркай!