Рәфис Кәлимуллин: “Хатын булмагач, җиңел түгел”

 Җырчының тормыш иптәше дә хастаханәгә эләккән. Җырчы белән хәбәрләшеп, хәл-әхвәлен белештек.
– Рәфис, тормыш иптәшегезнең хәле ничек?
– Тормыш иптәшем озак кына хастаханәгә мөрәҗәгать итмәде. Дарулар эчеп торды, тик авыртулары бетмәде. Хастаханәгә бардык. Бер атнадан артык хастаханәдә дәваланды. Хәзер өйдә инде. Лилия өйдә булганда өйдә дә рәхәт. Хатыным дәваланган арада өй эшләре дә, балаларны мәктәпкә озату-каршы алу кебек мәшәкатьләр үз өстемә ауды. Хатын булмагач, җиңел түгел. Тормыш иптәшем белән матур гына яшәргә язсын инде. 

– Башкортстан якларында концертларыгыз булмады. Ни өчен?
– Казан концертлары аншлаг белән үтте, шөкер. Тик Башкортстанда концертларны кичектерергә туры килде. Моңа техник сәбәпләр дә, күрше республикада концертлар оештыручылар белән аңлашылмаучанлыклар сәбәпче. Аллаһ Боерса, анда көзен концерт куярга исәп бар. Хәл итеп бетердек кебек.

– Махсус хәрби операциягә ярдәмдә дә соңгы арада активлык күрсәтәсез. Шулаймы?
– Махсус хәрби операция башланганнан бирле ярдәм итәм инде. Аны социаль челтәрләргә куйганым булмады. Соңгы арада: “Ник ярдәм иткәнне күрсәтмисең?” – дип килеп әйтә башладылар. Безнең халыкка күрсәтеп бирергә кирәк икән. Әмма намаз укысаң, мактана диләр. МХОга булышсаң, яхшылык эшләсәң, тагын гайбәт сөйлиләр. Булышканны күрсәтмәсәң, беркайда да булышмый, диләр. Алтын уртаклыкны табып булмый. Егетләргә күптән ярдәм иткәч, бәлки, тагын да күбрәк кеше кушылыр дип күрсәтергә булдым. Үзем дә МХО зонасына гуманитар ярдәм белән барам. Егетләр белән очрашып, көчебездән килгән кадәр булышабыз. 

– МХО турында җыр да язгансыз икән.
– “Алга” дигән җыр чыгардым. Җырның көен үзем яздым, сүзләре белән Гөлзирә Фәхретдинова ярдәм итте. Бу җырны егетләргә багышлыйбыз. Уңышлы гына булсын. Без концертлардан да өлеш кертеп барырга тырышабыз. Егетләр исән-сау әйләнеп кайтсыннар иде.