Зәринә Хәсәншина клиптагы төп геройдан ни өчен оялган?

- Зәринә, «Мәхәббәт йолдызым» җырына клип төшерәсең икән...

- Төшерү процессы әйбәт кенә узып китте. Әле төшергәннән соң да мин берничә көн җирдән өстәрәк йөрдем. Салкын көннәргә туры килсә дә, тирә-юньдә булган матурлык җылытып торды үзебезне. Клип бер-берсен яратып йөрүче егет һәм кыз, аларның саф, чиста мәхәббәте хакында. Геройлар икесе дә хыялый. Дөньясы шартлап китсен шунда, аларга барыбер.

-Көз айларында күбрәк сагышлы җырларга клип төшерергә яраталар. Син ни өчен бу ел фасылын сайларга булдың?

-Үзеннән-үзе шулай килеп чыкты. Клип төшерү күптәнге хыялым иде. Инде әти-әни дә: «Төшерергә кирәк», - дип әйтә башлады. «Нишләп клип төшермисең?» - дип язучылар да күп булды. Бу җәйдә инде хыялларны чынга ашырырга булдым. Әмма көтә-көтә, эзләнә-эзләнә бу эш көзгә калды. Юкка түгелдер, чөнки әлеге җыр да көз көне иҗат ителде, көз көне яздырылды, социаль челтәрләрдә дә ул шул чорда чыкты. Һәм мин үзем дә сары төсне үлеп яратам.

- Әти-әни дә клип төшерүемне теләде дисең, димәк, алар синең сайлаган юлны хуплый?

- Әйе, Аллага шөкер, әти-әни беркайчан да җырлавыма каршы төшмәделәр. Алар миңа этәргеч ясап тора һәм шул ук вакытта төп тәнкыйтьчеләр дә. Әнием үзе җырчы булмаса да, кечкенәдән мине сәхнәдә ничек үз-үземне тотарга кирәклегенә өйрәтте. Ә әти инде күбрәк тышкы кыяфәткә каты тора.

- Әти-әниеңнән кала тәнкыйтьләүчеләр бармы?

-Тәнкыйть сүзләрен еш ишетмим, тик алай да, сирәк булса да, каты гына әйткәләгәннәре булды. Мөслимдә бер абый сәхнә артына кереп, җырымны, күлмәгемне, сөйләвемне тәнкыйтьләп чыгып китте. Бу аның фикере - тыңлаучы фикере, моны ишетә белергә кирәк, әлбәттә. Әле күптән түгел генә «Казан егетләре» белән гастрольләрдән кайттык.

- «Казан егетләре» усал түгелләрме?

- Мин аларга 18 яшемдә килеп эләктем. Без беренче көннән үк дуслаштык, үзенә күрә ниндидер туганлык хисләре дә бар, алар миңа абыйларым төсле. Без инде бер гаилә кебек.

- Клипка әйләнеп кайтсак, төп геройның берсе - син, ә берсе?

- Минем күптән уйлап йөргән кешем бар иде. Әмма мин аңарга әйтергә оялдым. Ул сәхнә кешесе, күпләр аны беләләр. Клип төшерергә тотынгач, мин бу кеше турында видеограф, клипмейкер Айдар Валиулловка әйттем. «Әйе, бик әйбәт, бик туры килә»,- диде. Нәтиҗәдә, мин әлеге кешегә мөрәҗәгать иттем. Ул бик тиз ризалашты. Тиздән әлеге клипны социаль челтәрләрдә, телевидениедә күреп булачак.