#Сорау-җавап 28 марта 2019, 14:01

Тәрбиягә алынучы балалар саны күпмедән артмаска тиеш?

28 марта 2019, 14:01

Мин тәрбиягә күпләп бала алучы гаиләләргә сокланам, ләкин, икенче яктан, күңелгә шик тә керә. Аларны карап, тәрбияләп бетерергә, җавап та бирәсе бар бит әле. Татарстанда бер гаиләгә ничә баланы тәрбиягә алырга ярый икән? Шул турыда язып чыга алмассызмы икән? Гөлинә Әпсәләмова, Әтнә.

Скопировать ссылку

Татарстанның бала хокуклары буенча вәкаләтле вәкиле Гүзәл Удачина әйтүенчә, федераль нормативлар тәрбиягә алынган балалар санын 8гә кадәр чикләргә тәкъдим итә. Әлеге сан эченә гаиләнең балигъ булмаган үз балалары да керә. Бу тәкъдимне субъектлар үтәргә дә, үтәмәскә дә мөмкин.
– Татарстанда мондый гаиләләрне тикшерү нәтиҗәләре балаларга карата бернинди дә хокук бозу очракларын тапмаган иде. Ләкин 2017 елдагы очрактан соң, без федераль нормативларга таянырга кирәк, дигән карарга килдек. Һәм узган елдан әлеге норматив буенча эшли башладык. Хәзер без, балигъ булмаган үз балаларын да кертеп, бер гаиләгә сигездән артык баланы тәрбиягә бирмибез.
Хәзерге вакытта республикада 8дән артык баланы үз гаиләләренә сыендыручылар да бар. Ләкин алар бу карар кабул ителгәнче гаиләгә алынган балалар. Хәзерге вакытта Татарстанда тәрбиягә бала алган 1400 гаилә исәпләнә. Аларның 1200е бердән алып өчкә кадәр баланы сыендырган.