Мәчеткә кереп булмый

Авыл мулласы Кәрибулла Ибраһимов исеменнән Апас муниципаль районы хакимияте башлыгы Равил Хисаметдиновка мөрәҗәгать ителгән хатка 25 кеше имза куйган.

“Хөрмәтле Равил Фәритович, без – Чирмешән авылы мәчетенә йөрүче картлар һәм авыл халкы – сезгә үтенеч белән мөрәҗәгать итәргә булдык, – диелә әлеге хатта. – Урта бер җиргә урнашкан мәчетебез авылның яме һәм нуры булып тора. Тик борчыган нәрсә бар: язгы-көзге чорларда мәчет тирәсе пычрак сазлыкка әверелә, мәчеткә керү кыенлаша, резина итекләр кирәк була. Авылның үзәк урамына түшәлгән ташлы юлга кадәр бару без өлкәннәр өчен кыен хәл шул. Үзәк юлдан 20-25 метр читтәге мәчеткә пычрактан атларга мәҗбүр булабыз. Без-авыл өлкәннәре әлеге араны ташлы юл итеп саласы иде, дип уйлыйбыз. Җәяүлеләр кереп йөрер өчен сукмак ясыйсы иде, дип хыялланабыз. Әлеге арага бер “КамАЗ” машинасы таш җитәр иде, дип исәплибез. Ләкин авыл картлары үзебез генә акча җыешып башкарып чыга ала торган эш түгел бу. Таш кайтартырга финанс якларыбыз мөмкинлек бирми.

Шунлыктан, сезгә ярдәм сорап мөрәҗәгать итәргә булдык. Изге һәм газиз эшләрдә катнашып, Чирмешән авылы мәчетенә бер “КамАЗ” вак таш кайтартуда булышуыгызны үтенәбез”.

Бу хатны укыгач, Чирмешән авылы халкы 20-25 метр арага вак таш кайтартмаслык, җыйнаулашып, елга ташыннан сукмак түшәмәслек мөшкел хәлгә калганмы икән ни соң, дип уйлап куясың. Үзара салым акчасыннан да төзекләндереп була бит инде ул 20 метр араны. Хәер, бу авылда җирле халык тырышлыгы белән дә бик күп эшләр эшләнә, аларга “афәрин!” диясе генә кала. Алдагы көннәрдә без үзебез дә шунда барып кайтырга уйлап торабыз әле. Ни генә фаразласак та, бу хатта авыл картларының мәчеткә керү өчен вак таштан сукмак-тротуар ясатырга хыялланулары ачык аңлашыла.

Апас районы башлыгы Равил Хисаметдинов, Татарстан мөселманнары Диния нәзарәте шушы мәсьәләгә игътибар юнәлтерләр, Чирмешән авылыннан чыккан эшкуарлар һәм кешеләр мәчет картларының хыялын тормышка ашыруда ярдәм оештырырлар, дип өметләник.

Фото: http://apastovo.ru  архивыннан