Адел Вафин: «Авыруны җиңгән балаларның күбесе киләчәктә табиб булыр дип ышанам» (ФОТОЛАР)

Татарстанның балалар клиник хастаханәсе территориясендә урнашкан авыр хәлдә калган балаларга тернәкләнү, бушлай тору мөмкинлеге бирә торган әлеге хоспис Россиядә бердәнбер.

Рональд Макдональд йорты 2013 елдан бирле дүрт меңләп баланы кабул итәргә өлгергән. Ел саен биредә 600ләп гаилә тернәкләнү уза. Авыру балаларның тормышларын күңелле, мавыктыргыч итәр өчен Рональд Макдональд йортында төрле чаралар, мастер-класслар, танылган кешеләр белән очрашулар оештыралар. Шундый чараларның берсе "Яхшылык. Мин менә нәрсә иҗат итәм" дип исемләнгән бәйрәм бүген үтте. Хосписның төп иганәчесе "Макдональдс" компаниесе ел саен Россия күләмендә хәйрия акциясе уздырып, фри бәрәңгесеннән сатылган акчаны балаларны сәламәтләндерүгә тота.

Бу чара быел ноябрь аенда узачак. Алдагы еллардан аермалы буларак, бу юлы фри бәрәңгесе тышлыгында балалар үзләре ясаган рәсемнәр урын алачак. Һәр теләгән кеше яхшылык темасына сүрәтен ясап, Ронадльд Макдональд йорты фондының сайтына юллый ала. Жюри иң уңышлы 12 эшне сайлап алачак. Бәйрәмдә фри бәрәңгесенең зур гына каплары - инсталляцияләр дә куелган иде. Хосписта дәваланучы балалар, Татарстанның Сәламәтлек саклау министры Адел Вафин, республика балалар клиник хастаханәсенең баш табибы Рафаэль Шәвәлиев, Татарстанның һәм Россиянең халык артисты Венера Ганиева күмәкләшеп рәсем ясады. Бу каплар Мәскәүдә заманча сәнгать музеенда урын алачак, ди.

- Мондагы балаларның гомерләренең бер өлеше хосписта уза. Бу йорт аларның гаиләне күзаллауларын формалаштыра. Гаилә - алар өчен әти-әниләрдән тыш, табиблар, ак халатлы шәфкать туташлары да. Авыруларны республика балалар клиник хастаханәсенең тәҗрибәле белгечләре заманча ысуллар ярдәмендә дәвалый, хәйрия чарасы авыруларга зур файда китерә. Мин дә проектта катнаштым. Кояш, елмаю ясадым. Кояш - ул энергия, мәхәббәт. Ул - яхшылык символы. Авыруны җиңәр өчен позитив булу, елмаерга үзеңдә көч табу мөһим. Балаларның өметләре өзелмәсен иде. Авыруны җиңгән балаларның күбесе үзе дә киләчәктә табиб булыр дип ышанам, - диде Адел Вафин.

^{Автор фотолары}