Җәйге каникулларны хәвеф-хәтәрсез үткәрик!

Җәен балалар ролик, велосипед һәм самокатлар сезонын ачып җибәрә. Сабыйларның төрле дәрәҗәдәге тән җәрәхәтләре алуына нәкь шулар сәбәпче була да инде. Баланы урамга чыгарып җибәрү алдыннан ата-ана аның белән инструктаж үткәрергә тиеш.

"Ата-аналар балаларга төгәл күрсәтмәләр бирә - кайда һәм ничек йөрергә. Әгәр дә сез балагызга велосипедка, скутерга утырырга, самокатта, роликларда йөрергә рөхсәт итәсез икән, әлбәттә, һичшиксез, шлем һәм гадәти саклану чаралары булырга тиеш. Һәм киемдә һичшиксез яктылыкны кире кайтара торган элементлар булуы мөһим. Бу бит бер дә авыр түгел, әмма әлеге гамәл имгәнүләрне булдырмаска ярдәм итәчәк", - ди травмотолог.

Җәен коену урынын сайлауга һәм баланың суда үз-үзен тоту кагыйдәләренә дә аерым бер игътибар итү зарур. "Баланың кайда йөзәчәген катгый контрольдә тотарга кирәк. Ике алтын кагыйдә бар: әгәр дә җиде яшьтән кечерәк бала икән - ата-аналар аның белән кул сузымы ераклыгында булырга тиеш. Әгәр зуррак икән, ата-аналарның күзләре балага гына юнәлтелгән булырга тиеш. Бу тиз арада батучы бала янына килеп, аны коткарып калу өчен кирәк", - дип ассызыклады Дзюменко. Балалар травмотологы билгеләп үткәнчә, дөрес сайланылмаган кием дә имгәнү куркынычы тудырырга мөмкин. Аны баланың үз ялын ничек уздыруы һәм кайда йөрүенә туры китереп сайларга кирәк. Уен өчен мәйданчыкны шулай ук әти-әнисе, яки әби-бабасы сайларга тиеш: баланың яшенә туры китереп сайланмаган уен мәйданчыгы да куркыныч тудырырга мөмкин.

Ленар Дзюменко шулай ук ата-аналарны үз балаларын яхшырак күзәтергә һәм саклык чаралары турында профилактик әңгәмәләр үткәрергә чакыра. Ә, гомумән, каникулларда балаларыгыз белән кинофильмнарга, күргәзмәләргә барырга вакыт тапсагыз, үзегезгә дә, аларга да рухи азык булыр!