#Сәясәт 12 мая 2021, 13:37 Уку өчен 3 минут

Рөстәм Миңнеханов мәктәп укучыларының әти-әниләре белән очрашырга әзер

12 мая 2021, 13:37

Уку өчен 3 минут

Бүген 175 нче гимназиядә булганнан соң ук Татарстан Президенты Рөстәм Миңнеханов журналистлар өчен оператив хәлне шәрехләде. «Кичә булган фаҗигале вакыйгалар турында мәгълүмат җиткерәсем килә, - диде Рөстәм Миңнеханов. - Бүген иртән медицина хезмәткәрләре федераль хезмәттәшләре белән берлектә консилиум уздырган. Республика госпитальләрендә 23 зыян күрүче дәва ала. Кичә бу сан азрак иде, ләкин тагын ике кеше медицина ярдәме сорап мөрәҗәгать итте - аларның торышы тормыш өчен куркыныч тудырмый.

Скопировать ссылку

Рөстәм Миңнеханов мәктәп укучыларының әти-әниләре белән очрашырга әзер

Карар кабул ителде - сигез кеше Казаннан Мәскәүгә күчереләчәк. Гадәттән тыш хәлләр министрлыгы борты биредә урнашкан, һәм якындагы сәгатьләрдә зыян күрүчеләр безнең илнең иң яхшы госпитальләренә күчереләчәк. Бу биш бала һәм өч өлкән кеше.
Владимир Путинга медицина учреждениеләрен, федераль органнарны, Россия Сәламәтлек саклау министрлыгын җәлеп итү турындагы карары өчен рәхмәт белдерәсем килә. Казанда күрсәтелгән беренчел ярдәм киләчәктә Мәскәүдә дә уңай нәтиҗәләр бирер дип ышанам.

Башка зыян күрүчеләр буенча да эш бара. Мин инде ике тапкыр ДРКБда булдым, балалар белән сөйләштем, барлык кирәкле чаралар уздырылды, аларга бөтен кирәкле медицина ярдәме күрсәтелә.

Бүген республикада бу фаҗигадә һәлак булучылар буенча матәм көне игълан ителде. Татарстан Республикасы Хөкүмәтенең һәлак булучыларның һәм зыян күрүчеләрнең гаиләләренә финанс ярдәме күрсәтү турында карары кабул ителде. Һәм мин ышанам, инде бүген үк зыян күрүчеләр һәм һәлак булганнарның гаиләләре финанс ярдәме алачак.

Җирләү чараларын тәэмин итү белән бәйле барлык процедуралар да уздырылган, хәзерге вакытта 8 кеше җирләнгән. Без һәлак булганнарның барлык якыннарының кайгысын уртаклашабыз, бу - бик зур югалту...".

Рөстәм Миңнеханов шулай ук хәбәр иткәнчә, зыян күрүчеләр һәм аларның якыннары өчен ике психологик ярдәм пункты эшли, 150 психолог җәлеп ителгән, индивидуаль эш алып барыла. "Һәр очрак буенча, һәр сорау буенча эш бара, - дип ышандырды ул. - Укучылар яшәгән барлык фатирларны, йорт хуҗалыкларын йөреп чыктык, шәхси эш алып барыла. Бөтен кирәкле ярдәм күрсәтеләчәк".
Без барыбыз да бераз тынычлангач - мин укучыларның әти-әниләре белән очрашырга, ярдәм чаралары турында фикер алышырга, аларны тыңларга әзер, дип белдерде Татарстан Президенты.

Рөстәм Миңнеханов шулай ук билгеләп үткәнчә, илнең барлык төбәкләре да фаҗигагә бәйле рәвештә Татарстанга ярдәм һәм теләктәшлек сүзләрен белдерә. Ул уйлары белән Татарстан халкы, һәлак булучыларның гаиләләре һәм зыян күрүчеләр белән бергә булганнарга рәхмәт белдерде.