Даруны күп ашыйбыз

2013 елда ТР фармацевтика хезмәте эшчәнлеге нәтиҗәсе һәм 2014 елга бурычлар буенча республика киңәшмәсендә ТР сәламәтлек саклау министры урынбасары Фәридә Яркәева билгеләп үткәнчә, дарулар куллануның уртача күләменнән чыгып, авырулар үсешен дә күрергә мөмкин. Аның сүзләренчә, бүген ил җитәкчелеге тарафыннан сәламәтлек саклау һәм дарулар белән тәэмин итү өлкәләрендә системалы үзгәрешләргә зур игътибар бирелә.
ТР сәламәтлек саклау министры Гадел Вафин былтыр халыкны 2025 елга кадәр дарулар белән тәэмин итү стратегиясе раслануын билгеләп үтте. Аныңча, бу документ ташламалы дарулар алу хокукына ия булмаган хезмәткә яраклы гражданнарны дарулар белән тәэмин итү үсешендә әһәмиятле булачак.
Киңәшмәдә хәбәр ителгәнчә, Татарстанның фармацевтика базары үсеше темпы Россиянекеннән югарырак. Республикада барлыгы 1731 ФАП эшләп килә. Үткән елда авыл халкына, дару китерү һәм сату килешүе буенча, 51,7 млн сумлык дәвалау препараты һәм башка даруханә товарлары җибәрелгән.