Башкалабызда 2013 елда узачак студентларның халыкара җәйге Универсиадасына 14 юл-транспорт чишелеше сафка басачак.
Аның өчесе инде әзер, тагын берьюлы 11 урында күпер салу бара. Төзелешләрнең шушылай зур колач белән үткәрелүе (әле бит биналар, спорт корылмалары да төзелә) белгечләр һәм эшче кадрлар кытлыгы тудырды. Ямашев проспекты белән Декабристлар урамы киселешендәге юл-транспорт чишелеше проектында төгәлсезлекләр җибәрелде, кимчелекләрне бетерү графикка сукты. Җиңү проспекты аша Сахаров урамы буенча килкән эстакададан транспорт хәрәкәте җибәрелсә дә, җәяүлеләр мәнфәгате «онытылып» калды. Светофорлар да, тротуарлар да юк, халык биредә тездән саз ера.
Казанның Әмирхан һәм Чистай урамнары - магистраль урамнар, монда транспорт агымы бик көчле. 2008 елда «Татинвестгражданпроект» сызымнары нигезендә Әмирхан - Чистай урамнары киселешендә юл-транспорт чишелеше төзи башлау котылгысыз рәвештә бөке хасил итте. Корылма график буенча быел сафка басарга тиеш иде. Мәгълүматларга караганда, ачылыш 2012 елга калдырылган. Шәһәр башкарма комитетында узган «эшлекле дүшәмбе» киңәшмәләрендә мэр Илсур Метшин, үзләренә йөкләнгән эшләрне озак башкарганлыклары өчен, генераль подрядчы - «Казан» җитештерү-төзелеш оешмасын кискен тәнкыйтьләде. Ниһаять, автомобильчеләр бу участокта беркадәр иркен сулыш алырга охшап тора. Төзүчеләр ышандырганча, октябрь ахырларында «Миллениум» тарафыннан Әмирхан урамы буенча килгәндә Чистай урамындагы эстакада астыннан турыдан-туры Ямашев проспекты ягына узып булачак. Ноябрь аенда әлегә «эш тәртибендә» күпернең үзеннән дә хәрәкәтне җибәрү ниятләнелә. Ямашев проспекты тарафыннан Әмирхан урамы буенча «Миллениум» күперенә таба хәрәкәтләнгәндә Чистай урамындагы эстакада астыннан хәзергә турыдан-туры чыгып булмаячак, терәткеч конструкцияләр берникадәр соңрак алыначак. Димәк, «Татнефть-Арена» янәшәсендә көн саен иртә-кич хасил була торган зур бөкегә «сәлам» бирергә туры киләчәк.
Бүгенге хәрәкәт кыенлыкларыннан зарлансак та, күперләрнең тиздән уңайлыклар тудырачагы күңелдә өмет уята. Шәһәр җитәкчелегенең дә «сабыр итик» дип чакыруына колак салмый булмый.
Иң мөһим һәм кызыклы язмаларны Татмедиа Telegram-каналында укыгыз
