Шәһри Казан

Шәһәр үзәген Автопаркинг коткарыр

Меңьеллык тарихка ия шәһәрләрнең берсенең дә үзәк урамнары бүгенге автотранспорт ташкынын күтәрә алмый. Европа илләрендә инде дистә еллап элек үк шәһәр эчендә һәм шәһәргә керү чикләрендә автопаркинглар төзеп, бу мәсьәләне уңай хәл итәргә тырышалар.

Казанда 2013 елда узачак Студентларның халыкара җәйге Универсиадасы автопаркинглар төзелешен дә тизләтеп җибәрде. Шәһәр үзәгендә, аерым алганда Тукай мәйданы тирәсендә, автомобиль куеп тору мөмкинлеге тулысынча беткән иде инде. Ниһаять, Островский урамында «Татэнерго» ачык акционерлык җәмгыятенең административ бинасы белән Меңьеллык паркы арасындагы җир кишәрлегендә автопаркинг төзүгә керешелде. Төзелешнең заказчысы - энергия җитештерү белән шөгыльләнә торган «Генерирующая компания» ачык акционерлык җәмгыяте. Корылма сызымын «Татинвестгражданпроект» дәүләт унитар предприятиесе әзерләгән. Төзелешкә Казанның «Грань» җаваплылыгы чикләнгән җәмгыяте коллективы алынган. Автопаркингның бер каты җир астында һәм тагын берничә каты җир өстендә булачак. «Туфрак ишелүләрне чикләү өчен, субайлар кагу белән мәшгульбез. Шуннан соң чокыр казуга керешәбез. Төзелешне 2012 елның декабрендә тәмамлау бурычы йөкләнде», - дип аңлатма бирде «Грань» вәкиле. Шәһәрнең экологик чисталыгын кайгырту да игътибарга лаек. Төзелеш мәйданына килгән-киткән йөк машиналарының тәгәрмәчләрен юдырту өчен автоюдырткыч көйләү бара.
Островский урамындагы юл читләренә, «Татэнерго» бинасы янына тыгылышкан транспорт чаралары киләсе елда яңа автопаркингка күчкәч, җәяүлеләр генә түгел, Габдулла Тукай һәйкәле дә «иркен сулап» куяр, шәт.

Реклама

Нравится
Поделиться:
Реклама
Комментарии (0)
Осталось символов: