Стационар ачылды

1963 елда төзелгән дәваханә бинасы, шактый искергәнлектән, 2006 елда ябылган иде. Шунлыктан, шәһәр хакимияте төп бинага янкорма төзү турында карар чыгарды. Яңа корпусның беренче катына йогышлы авырулар блогы, профилактика һәм белгечләр бүлеге урнашкан. Икенче катта көндезге стационар һәм диагностика кабинетлары урын алган. Гомумтабиблык практикасы бүлеге - өченчедә, тиздән шушы катка хатын-кызлар консультациясе дә күчереләчәк. Соңгы дүртенче катны администрация блогы били.
Яңа корпусны төзү 80 миллион сумга төшкән, янә 6 миллион сумга медицина җиһазлары сатып алынган. Учреждение белән Казан мэры Илсур Метшин да танышты. Ул: «Совет районындагы Дәрвишләр бистәсендә 3 урында фельдшер-акушерлык пункты, Нагорныйда амбулатория, Азино микрорайонында балалар өчен зур дәваханә ачылды. Дәрвишләр бистәсендә көндезге стационар ачу турындагы вәгъдәбезне дә үтәдек. Бистәдә хәзергә төрле биналарга урнашкан балалар дәваханәсен дә бер корпуска туплау мәсьәләсен хәл итәрбез», - дип ышандырды.