16+

Владимир Путин: «Оныкларымны ялганламаска өйрәтеп калдырыр идем»

Бүген Россия Президенты Владимир Путин уналтынчы тапкыр «туры элемтә» уздырды. Исегезгә төшерәбез: Ил башлыгының беренче тапкыр халык белән мондый «очрашу»ы 2001 елда булган иде.

Владимир Путин: «Оныкларымны ялганламаска өйрәтеп калдырыр идем»

Бүген Россия Президенты Владимир Путин уналтынчы тапкыр «туры элемтә» уздырды. Исегезгә төшерәбез: Ил башлыгының беренче тапкыр халык белән мондый «очрашу»ы 2001 елда булган иде.

Владимир Путин 12 тапшыруда – Президент, ә дүртесендә Премьер-министр буларак җавап тотты.

Быелгысы башка еллардан аермалы булды. Владимир Путин халыктан килгән шикаятьләрне һәм тәкъдимнәрне видеоконференция форматында төбәк башлыклары һәм хөкүмәт әгъзалары белән бергә карады. Шул ук вакытта студиядә кунаклар да юк иде. Аның каравы, алып баручылар белән бергә волонтерлар һәм смс, ммс, видеошалтыратуларны чагылдырып барган зур экраннар күп иде.
Дүрт сәгать ярым барган «туры элемтә» вакытында Россия Президенты 79 сорауга җавап бирде. Ул башланганчы ук, халыктан 2 млн 300 мең сорау кабул ителгән иде. Алып баручылар әйтүенчә, кабул ителгән сорауның һәр бишенчесе социаль характерда булды. Шунысы игътибарга лаеклы: Президентка бирелгән сораулар саны буенча Татарстан өченче урында булса да, халык белән аралашу вакытында безнең республикадан бер кешенең дә соравы яңгырамады.

Бензинга бәя арту

«Туры элемтә»гә бензин бәяләре артуга бәйле сораулар күп килгән иде. Алып баручы аларның берсе Татарстаннан кабул ителүен хәбәр итте. «Туры элемтә»гә чыккан Алексей исемле ир-атның: «Кичә 39 сум иде, бүген – 41 сум. Бензинга бәя артуны туктатыгыз. Бөтен ил шуның өчен тавыш бирде бит!» – дигән мөрәҗәгатенә Владимир Путинның җавабыннан аңлашылганча, бензинга бәя арту нефть экспортын җайга салучы «салым маневры» белән бәйле. Әлеге сөйләшүгә Россиянең энергетика министры Александр Новак та кушылды. Аның сүзләренчә, чыннан да, бензин бәясе 5,6 процентка арткан – бу инфляциядән югарырак. Хәзерге вакытта Хөкүмәт бәя артуны туктаткан. 1 июньнән акцизларны төшерү буенча карар кабул ителгән.

Президент шулай ук Монополиягә каршы федераль хезмәтне дә ягулыкка бәя үсүгә битараф карамаска өндәде.

Чемпионаттан соң

Владимир Путин «туры элемтә»дә белдергәнчә, Россиянең футбол инфраструктурасы Футбол буенча дөнья чемпионатыннан соң да тик торырга тиеш түгел.
– Балалар һәм яшүсмерләр командалары, лигалар булдырырга һәм ярышлар оештырырга кирәк. Әлеге барлык объектлар да үз бәяләрен акласын һәм нәтиҗәле эшләсен иде. Акыллы эш иткәндә, боларны башкарып чыгарга мөмкин, чөнки заманча стадион – ул бит футбол кыры гына түгел, стадионнар эчендәге бик күп биналар, – диде Путин.

Аның сүзләренә караганда, бу мәсьәләдә күп нәрсә төбәк җитәкчеләреннән тора, чөнки Чемпионаттан соң спорт объектлары алар карамагына күчәчәк. Шулай ук ул бу мәсьәләдә Россия футбол союзы да актив катнашырга тиешлеген белдерде.

YouTube һәм Instagram эшләячәк

Владимир Путин Россиядә YouTube һәм Instagram сервисларын блокировкалау куркынычы янамавын әйтте.
– Мин сезнең борчылуны аңлыйм һәм сезнең белән интернетта эшләгән кешеләрнең дә борчылуын аңлыйм. Без бер нәрсәне дә ябарга җыенмыйбыз, – дип белдерде Путин әлеге социаль челтәрләрне ябу турында интернетта таралган сүзләр турында әйткән блогерга.

Пенсия яше
 
«Туры элемтә» вакытында Владимир Путин: «Пенсионерларның керемнәрен арттыру – Россия Хөкүмәте өчен пенсия яшен озынайтуга караганда мөһимрәк бурыч», – дип белдерде.
Пенсия яшен арттыру турындагы сорауны Владимир Путинга Курск шәһәреннән Алексей Гончаров бирде.

Путин әйткәнчә, СССР вакытында эшләүче пенсионерларга пенсия түләмәгәннәр, ләкин хәзер бу мәсьәләне кабат карарга кирәк. Ул эшләүче пенсионерлар аз түләнә торган эшләрдә мәшгуль, диде.
Путин пенсия яшен арттыру темасына «бик сак» карашта булуын әйтте.

– Тагын бер тапкыр әйтәсем килә: пенсия белән тәэмин итү системасында төп бурыч – пенсионерларның керемнәрен һәм тормыш дәрәҗәләрен яхшырту, – диде Россия Президенты.

Ипотека ставкасы

«Туры элемтә» вакытында Иваново шәһәрендәге күп балалы гаиләне дә күрсәттеләр. Гаилә башлыгы сөйләвенчә, аларның өч баласы һәм ипотека кредитлары бар.

– Дөрес, 11 процентлы ипотека ставкасын 6 процентка азайту турында карар кабул ителгән, тик аның 9нчы пункты буенча, бу законның безгә файдасы юк. Анда дүртенче бала турында берни дә әйтелмәгән. Әгәр ул ике һәм аннан соңгы балалары туган гаиләләр дип төзәтелсә, бу ярдәм бик күп гаиләләргә тияр иде, – дип мөрәҗәгать итте гаилә башлыгы.

Һәм ул Президенттан әлеге законга үзгәрешләр кертүне сорады.
– Мин хәзер Финанс министрлыгының кәефен төшерәчәкмен, чөнки бу карар хаталы, аны төзәтергә кирәк. Моның өчен 9 млрд сум акча кирәк булачак, ул кадәрле үк зур акчалар түгел. Һичшиксез, хөкүмәт рәисе белән сөйләшәчәкмен, без моны төзәтербез, – диде Путин.

Шуннан соң экранда финанс министры Антон Силуанов пәйда булды.
– Без ставкаларны киметү буенча барлык чараларны да күрәбез. Хәзергә ул – 9,7 процент, ә кайчандыр ике тапкырга күбрәк иде. Сезнең күрсәтмә буенча без аны карарбыз. Безнең төп бурыч – ипотекадан күпчелек гражданнарны файдаланырлык итү, – диде ул.

Чүп яндыру заводлары буенча

Волонтерлар чүп-чар белән бәйле сорауларның күп килүен дә җиткерде. Алар сүзләренә караганда, халык чүп яндыру заводларыннан курка, инде мондый заводлар эшли торган төбәкләрдән куркыныч хатлар килә, аларда яшәүчеләр суларга һава юклыктан зарлана, диде алар. Мондый эчтәлектәге мөрәҗәгатьләрне татарстанлылар да күп калдырган иде.

– Бу сорау бик мөһим һәм кискен. Совет заманында чүп бөтенләй диярлек утильләштерелмәгән. Илдә 70 млн тонна калдык җитештерелә һәм бу проблема һаман кискенләшә. Бездә 1100 полигон азмы-күпме дәрәҗәдә нормаль хәлдә. Уннарча мең чүплекләр. Утилизация төрле юллар белән башкарылырга мөмкин. Яндыру буенча безнең 117 предприятиебез бар, әмма аларның нибары 38е генә заманча технологияләр буенча эшли. 2024 елга кадәр без калдыкларны утильләштерү буенча 200 завод төзергә тиеш. Сүз иң заманча технологияләр кулланып төзелгән оешмалар турында бара. Матбугат чараларында бу заводларның ничек эшләвен гел күрсәтәләр. Бу мәсьәләдә волонтерлар, дәүләт һәм төбәк органнары белән эшләргә кирәк. Губернаторлардан күп нәрсә торачак, – диде Владимир Путин.


«Туры элемтә» вакытында алып баручылар Владимир Путин белән блиц сораштыру эшләде.

1. Нәрсә эшләргә кирәклеген белмәгәндә, Сез нәрсә эшлисез?
Путин: «Автомобилистларда шундый кагыйдә бар: шикләнәсең икән – узма. Минем кебек вазифадагы кешеләрнең хаталарының бәһасе зур. Белмим икән – чишелеш табарга тырышам».

2. Үзегездән еш көләсезме?
Путин: «Мин моны еш эшлим».

3. Сез ишеткән иң уңышсыз мәзәк нинди иде?
Путин: «Күптән түгел генә Германиянең танылган бер басмасы, Трамп Путинның кулына Европаны этеп җибәрә, дип язган иде. Әгәр моны моннан алданрак яңгыраган Россия АКШтагы сайлауларга тәэсир итте дигән мәзәк белән берләштерсәң, бик кызык килеп чыга: янәсе, без сайлауларга тәэсир иткәнбез дә, ә ул шуның өчен безгә Европаны бүләк итә. Бөтенләй башка сыймаслык хәл, шуңа күрә моны мәзәк дип атаудан башка юл юк».

4. Оныкларыгызга нинди киңәш биреп калдырыр идегез?
Путин: «Ялганламаска».

5. Сез Аллаһы Тәгаләгә ышанасызмы?
Путин: «Бу бик шәхси сорау. Сез беләсез, моның турында публикага сөйләү авыр. Минемчә, кеше күңелендә ышаныч белән туа. Ләкин төрле кешеләр моны төрле вакытта, төрле хәлләрдә генә аңлый башлый. Әйтик, Бөек Ватан сугышы вакытында хәтта иң көчле атеистлар да, окопта ятканда, атакага барганда, Алла турында уйлагандыр дип ышанам. Моны бернинди экстремаль хәлләрсез дә аңлаучылар бар. Ләкин экстремаль хәлгә юлыккач, һәрбер кеше дә моны уйлый торгандыр».

Зөһрә Садыйкова әзерләде.

Фото: kremlin.ru

 

Язмага реакция белдерегез

1

0

0

0

0

Реакция язылган инде

Комментарийлар

Мөһим

loading