Казанда узган ел 1593 юл-транспорт һәлакәте теркәлде, аларда 100 кешенең гомере өзелде, 1826сы төрле авырлыкта имгәнде.
Татарстан Республикасында юл-транспорт хәле мәсьәләсенә кагылышлы киңәшмәдә Татарстан буенча эчке эшләр министры Әсгать Сәфәров хәрәкәт иминлегенең республика Хөкүмәте югарылыгында игътибар үзәгендә тотылуын әйтте. «Юллардагы аварияләрдән миллиардларча сум зыян килә. Ләкин ул кешеләр гомеренә тиңләшә алмый, чөнки кеше гомере - бәһасез», - диде үзенең чыгышында республиканың ЮХИДИ идарәсе җитәкчесе Рифкать Миңнеханов.
Башкалабызда узган елны гына да 23 мең 989 автомобиль сатып алынган. Казанда хәзер 300 меңнән артык автомобиль теркәлгән. Шәһәрнең шушындый галәмәт зур шаукымы юл хәрәкәтендә катнашучылардан нык игътибарлылык таләп итә. Кызганыч, моңа әлегә ирешелми. Узган ел башкалада транспорт чараларын идарә итүчеләр гаебе белән 1617 авария ясалган, нәтиҗәдә бу 83 кешенең үлеме белән тәмамланган. Җәяүлеләрдән икеләтә саклык сорала, кызганыч ки, аларга да җаваплылык җитми. Җәяүлеләр гаебе белән 223 һәлакәт килеп чыккан, кагыйдәләрне санламау 24 җәяүленең үлеменә, ә 206 кешенең имгәнүенә китергән. «Пассажир транспортындагы һәлакәтләрнең әледән-әле кабатланып торуы безне борчуга сала. Транспорт предприятиеләренә карата таләпчәнлекне көчәйтәчәкбез», - диде Рифкать Миңнеханов.
Казанда урам юлларына фото һәм видеотеркәү аппаратлары кую уңай нәтиҗәләр бирә. Мәсәлән, 2004 елны юл һәлакәтендә 168 кеше вафат булса, узган ел әлеге сан - 100.
Татарстан Премьер-министры урынбасары - Министрлар Кабинеты Аппараты җитәкчесе Шамил Гаффаров: «Казанда һәм, гомумән, республикада юл хәрәкәтенә күзәтчелектә видеоаппаратураны тагын да күбрәк кулланышка кертергә кирәк. Озакламый юллардагы чокыр-чакырларны төзекләндерү башлана. Кирәкле эш булса да, ул көннәрдә аварияләр саны артып китүчән. Юл төзү-төзекләндерү хуҗалыкларының эшчәнлеген күз уңыннан ычкындырмагыз. Казанда 2013 елда Универсиада булачак, шунлыктан без хәрәкәт иминлеген тәэмин итүдә икеләтә җаваплылык тоярга тиеш», - диде, автоинспекторларга мөрәҗәгать итеп.
Иң мөһим һәм кызыклы язмаларны Татмедиа Telegram-каналында укыгыз
