100 мең тираж белән дөнья күрәчәк "Татар дөньясы" китабы тәкъдим ителде

Бу китап минем кулыма узган ел эләкте. ТАССР оешуга 100 ел тулу уңаеннан тантаналы чараларга старт бирелгәндә бүләк иткәннәр иде аны миңа. Зур, авыр китап. Тышкы яктан. Ә эче исә бик бай һәм затлы итеп эшләнелгән. Теле дә җиңел, фәнни терминнар белән “шыплап” тулмаган. Аны тарих белән кызыксынучы укучыга да, өлкән кешегә дә тәкъдим итәргә була. Басма ике ел дәвамында әзерләнгән һәм анда меңнән артык  иллюстрация кулланылган булуын да билгеләп үтәргә кирәктер.

-Укый торган публика өчен белемнәрнең китап булып басылуы—ул бәйрәм. Бигрәк тә китап халык тарихына багышланса. «Татар дөньясы» китабы мәктәпләрдә кулланырлык әсбап, - ди басманы әзерләүдә катнашучыларның берсе ТР Премьер-министры урынбасары Ләйлә Фазлыева.

Республика Президенты Рөстәм Миңнеханов инициативасы белән төзелгән басманы чыгаруда бик зур коллектив хезмәт куя. Алар арасында республиканың Фәннәр академиясе, Республика Президенты Аппараты вәкилләре, Министрлар кабинеты, Мәдәният министрлыгы һ.б бар.

- Китап татар халкына, аның тарихына яңача караш тудыра. Мәсәлән, китапны укыгач, Петр I ни өчен беренче күн эшкәртү мануфактурасын хәзерге Татарстан территориясендә төзегәне аңлашыла, - ди Ләйлә Фазлыева 100 мең тираж белән татар һәм рус телләрендә бастырылачак китап хакында.  

“Татар дөньясы” китабының электрон варианты ТАССРның 100 еллыгы сайтында  урнаштырылган.

Сүз уңаеннан, китап белем бирү оешмаларына, муниципаль китапханәләргә, Казан китапханәләренә, музейларга, архивларга тапшырылачак, дип белдерде ТР мәдәният министры урынбасары Дамир Натфуллин.

-Соңгы 5-10 еллыктагы китаплардан бу басма аерылып тора. Беренчедән ул бик вакытлы, ТАССРның 100 еллыгы уңаеннан чыкты. Мәдәният, фән ягыннан ул бик мәгънәле итеп язылган, - дип бәяләде урынбасар.

Китап авторларының берсе, тарих фәннәре докторы Искәндәр Измайлов та шундый фикердә.

- Яңа басма алдарак чыккан татар тарихы китапларыннан тамырдан аерыла. Элегрәк басылганнарында тарих этнология, этнография һәм антропология күзлегеннән өйрәнелә. Мәсәлән, җиде томлы „Татар тарихы“ исемле академик басма тарихны борынгы заманнардан хәзерге көнгә кадәр җентекләп күрсәтә. „Татар дөньясы“ китабында боларның барысы да бар, ләкин кыскартылган һәм киң даирә кулланучысына аңлаешлы форматта бирелә, - диде ул. 

Лилия ЛОКМАНОВА