«9 майда әти тальянда уйнады әле. 13е көнне китеп барды...»

91 яшендә бакыйлыкка китә. “Әти 2008 елда вафат булды, - ди Шәрифҗан ага. - 9 майны матур итеп үткәреп кайттык, әтинең район үзәгенә барырлык хәле юк иде. Бөтен балалары, оныклары җыелдык, әтине котладык. Шул көнне әти тальянда уйнады. 13е көнне йөреп торган җиреннән китеп барды. – Әни 2016 елда вафат булды. Инде менә берничә ел рәттән, әти белән әнине искә алып, ветераннарга хөрмәт йөзеннән 9 Май көнендә район үзәгендәге парадка йөрим”.  

Балтач районының Түбән Кенә авылында яшәүче Шәрифҗан Хөсәенов беренче тапкыр районның Җиңү парадында 2008 елда катнаша. Ул вакытта аның колхозда баш инженер булып эшләгән еллары. Район кушкач, колхозның “УАЗ” машинасының тентын ала да, район ветераннарын утыртып, парадта йөртә. Шуның белән бу хәлләр онытыла. 

Берничә ел элек, фотолар актарып утырганда, парадта йөргән истәлекләр  килеп чыга. Шул вакытта үземнең “УАЗ” машинасын әти-әнием хөрмәтенә парадка әзерләргә кирәк, дигән фикергә килә. Анда барыр алдыннан машинасын буяп, бизәп,  флаглар элә. Алга әтисенең фотосын урнаштыра. Тавыш көчәйткеч ялгап, гармунда тальянда үзе уйнаган көйләрне куя. Шәрифҗан абыйның машинасын күреп, аны якын-тирә авыллар үзләрендә узучы бәйрәмгә чыкыра башлый.  Шәрифҗан абый музыкалар яңгыратып акрын гына алдан бара, арттан балалалар. “Быел Карадуган авылында узган бәйрәмдә генә матур көн туры килде. Алдагы көндә яңгыр яугач, башка авыллардагы балалар белән урам әйләнеп булмады. Аларга да кызык, минем дә күңел рәхәтлек ала. Балалар яныма килеп машинам белән кызыксына, ничек итеп әзерләнүемне аларга да сөйлим”, - ди Шәрифҗан абый. 

Машинасын парадка әзерләүне ул традициягә керткән. Аякта йөреп торганда, сәламәтлеге барында ветераннарыбызга рәхмәт йөзеннән парадларга катнашуны ул үзенең бурычы дип саный.

Татарстан Рәисе Рөстәм Миңнеханов та Бөек Җиңүгә 80 ел тулуны тиешле югарылыкта уздырырга кушкан иде.