Автомобиль сатып алучыга мең дә бер киңәш!

Сатучы автомобильне күрсәткәнче үк сату-алу килешүе төзүне, аванс, залог түләүне таләп итә икән, бу да хокук бозу дип исәпләнә. Чөнки килешүдә, автомобильне сатып алудан баш тарткан очракта, түләнгән акчаның бер өлеше яки тулысынча тотып калынуы турында шарт язылган була.

Автомобильне кредитка сату-алу килешүен төзер алдыннан кулланучыларга процент ставкасының күләме турында дөрес булмаган мәгълүмат бирелүе ихтимал. Интернетта, сайтта яки реклама буклетларында килешүдә күрсәтелгәннән түбәнрәк процент ставкасы күрсәтелгән икән, бу инде кулланучының хокукы бозылган дигән сүз.

Дилерлар товарларны, эшләрне, автомобиль сатып алганда хезмәт күрсәтүне көчләп тагалар (ешрак кыйммәтле комплектация, өстәмә җиһазлар урнаштыру, иминиятләштерү, сервис эшләре һәм башкасы тәкъдим ителә) икән, сатып алучы хокукына зыян килгән дигән сүз.

Алдаудан ничек котылырга?
Автомобиль сатучы компанияләр турында фикерләрне игътибар белән өйрәнергә кирәк. Автосалонны сайлаганда аның теге яки бу маркалы автомобильләрне сатуга рәсми дилер булу-булмавын исәпкә алу мөһим. Яхшы репутацияле автосалонны сайларга тырышыгыз. Аның сайтында нинди мәгълүмат күрсәтелгәнлеген өйрәнегез. Сайтта сатучының исеме, аның урнашу урыны (адресы), эш режимы, сатучының контакт телефоннары һәм аның электрон почта адресы һәм башка мәгълүмат язылган булырга тиеш.

Базар бәясеннән түбән бәягә машина тәкъдим итүчеләргә сак карарга киңәш ителә. Сатучыдан сату-алу килешүе проектын электрон почтага җибәрүне сорарга, шулай ук сезне кызыксындырган автомобильнең бәясе һәм характеристикасы турында мәгълүматны, алдан танышу өчен, сорарга мөмкин.
Килешүне имзалаганчы аны яхшылап өйрәнергә кирәк, шул ук вакытта вак шрифт белән язылганнарның барысын да укырга онытмагыз. Документның нинди дә булса пунктлары канәгатьләндерми яки туры килми икән, имза куярга ярамый.

Килешүдә автомобильне китерү сроклары, аванс күләме, сатучы гаебе белән сатып алудан баш тартсагыз, аны кире кайтару тәртибе, шулай ук модель модификациясенең тулы тасвирламасы (завод комплектациясенә туры килсен!) күрсәтелергә тиеш. Бары тик укып чыккан килешүне генә имзалагыз.
Әгәр дә менеджер документ алып китеп, күпмедер вакыттан әйләнеп килсә, бу килешүне кабаттан җентекләп укып чыгыгыз. Иң куркынычсыз юл – банк картасы белән түләү, акча белән түләгәндә акча кертү фактын раслаучы документ таләп итәргә кирәк; теләсә кайсы очракта да касса чегы мәҗбүри (шул исәптән электрон рәвештә) булырга тиеш.

Нәрсәләрне тикшерү мәҗбүри?
Машинаны алып китәр алдыннан, аның дефектлары булу-булмауны тикшерегез – тырналган эзләр, янчелгән урыннар һәм башка кимчелеге юкмы. Двигательнең, шасси һәм кузовның VIN номеры килешү шартында күрсәтелгән белән туры килергә тиеш.

Комплектлаштыруны, техник сыеклык күләмен карагыз. Әгәр машина ачык һавада булса, аны карар алдыннан дефектларны күрер өчен, машинаны юу сорала.

Автомобильне кабул итү-тапшыру актын җентекләп тикшергәннән соң гына имзалагыз.
Автомобильләрне кредитка сату, артык түбән бәя, килешүне имзаларга һәм автомобильне караганчы аванс кертергә һәм офиста тулы комплект документлар (килешү, транспорт чарасы паспорты, гарантия талоны яки сервис кенәгәсе) булмау сатып алучыны сагайтырга тиеш.

Шуны истә тотарга кирәк, өстәмә товарлар һәм хезмәт күрсәтүләрне көчләп тагу "Кулланучылар хокукларын яклау турын"да 2 300-1 номерлы канунның 16 нчы маддәсе тарафыннан тыелган. Бу маддәне бозган компания клиентка барлык зыяннарны, шул исәптән тагылган товарлар яки хезмәтләр бәясен капларга тиеш була.

Фото: https://www.tatar-inform.ru