“Битлекләрне салырга иртәрәк”

6 февральдән алып коронавируска бәйле чикләүләр йомшартылды. Әйтик, әгәр дә коронавируслы кеше 7  көн дәвамында дәваланган икән, аның “больничныен” ябу өчен икенче тапкыр тест бирергә кирәк булмаячак. Моңа кадәр дәвалану вакыты  14 көн иде. 
Моннан тыш, ковид йоктырган кеше белән элемтәдә булучыга үзизоляциягә китү таләп ителмәячәк. 
Бу хакта коронавируска каршы оператив штаб уздырган туры эфир вакытында медицина фәннәре кандидаты, Роспотребнадзорның Татарстан буенча Идарәсенең эпидемиологик күзәтчелек бүлеге җитәкчесе  Лилия Юзлибаева хәбәр итте. 
“Хәзер коронавиурс күпкә җиңелрәк үтә. Шуңа да әлеге йомшартулар кертелде”, - дип аңлатты Лилия Юзлибаева. 
Шул ук вакытта, белгеч битлекләрне әле салырга иртәрәк, ди. 
“Авыру җиңел узса да, ул юкка чыкмады. Өстәвенә “омикрон” штаммы тиз тарала. Шуңа да битлекләрне кияргә, социаль дистанцияне сакларга һәм антисептиклар кулланырга кирәк”, - дип аңлатма бирде Лилия Юзлибаева.