Шәһри Казан

Челтәрдәге матурлыкка ышанма

Яратам социаль челтәрләрне. Бигрәк тә инстаграмны. Тормыш матур анда чөнки.

Кешеләр дә матур. Проблемалар артык чыгарылмый, борчулар сурәтләнми. Теге яки бу кеше үзен матур итеп фотога төшереп куйса, бу дөньяда аннан да бәхетлерәк адәм юк икән дип уйлый башлыйсың. Артистлар, танылган кешеләр турында гына сүз алып бармыйм. Гап-гади авыл кызлары-апалары, малайлары-абыйлары да шуңа омтыла. Нәрсәдән шулай икән?

Күп очракта адәм баласы реаль тормышта, инстадөньядагысы белән чагыштыр­ганда, күпкә... бәхетсезрәк, ямьсезрәк (кыяфәте белән генә түгел, эчке дөньясы белән диюем), мескенрәк. Шуны белә торып, андыйлар үзләрен виртуаль яшәештә булса да матуррак, бәхетлерәк, баерак итеп күрсәтәсе килә бугай. Төрле китаплардан цитаталар китереп, яшәү мәгънәсе, мәхәббәт, байлык, мотивация һәм башкалар турында сүз алып барганда, акыллы булып та күренә әле адәм баласы. Табигыйлык югала. Әйе, күп очракта инстаграмда хатын-кызы да, ир-аты да ясалма чыга кебек. 

Реклама

Кеше куян куа дигән кебегрәк, күпләр, бигрәк тә 50дән узганнар күпләп керә башлады инстага. Андыйлар фотосын да куймый, ким дигәндә, табигать, песи, башка хайваннарны кертеп, берничә сурәт кенә урнаштыра, постын да язмый, хештегын да куймый, башка мөмкинлекләрне дә кулланмый. Чөнки ул үз аккаунтын... кеше тормышын карап утырыр өчен ачкан. Кызык бит: кем кая барган, кайсы йолдыз кемдә кунакта булып нәрсә ашаган, чишенгәнме, киенгәнме, нинди киемнәр кия, кемнәр белән йоклый... – башкалар тормышын күзәтеп утырудан ләззәт табучылар артканнан-арта бара. Комментарий язарга өйрәнә алучылары кешенең берәр гамәлен яки сурәтен тикшереп, берәр гаеп табарга да, мактарга, үзе герое яшәешен күреп шатланырга да мөмкин. Гаеп табучылар, тузга язмаган сүзләр язып утыручылар арасында шул 50-60 яшьтән узучыларның күпчелекне тәшкил итүе күңелне төшерә. Кемнең кемдә эше бар бит инде, югыйсә. Юк шул, тыгыласы, пычратасы килә. Шунысы кызык: фотолары булган гаеп табучыларның аккаунтларын карыйсың да, аларның тормышы да матур бит кебек күренә. Әнә бит нинди тәмле бәлеш пешереп куйган, җыйган җиләген чыгарып салган, кулларына оныкларын алып, елмаеп торучылар да, ирен яратып сурәтләүчеләр дә, башларына яулык-түбәтәй каплаучылары да (иманда дип уйларга нигез бар) шактый. Ә үзләре шундый сүзләр яза.

Виртуаль тормышта матур булып күренәсе килә шул. Эчке дөнья гына күренми анда...

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (8)
Осталось символов:
  • 2 февраль 2020 - 14:38
    Без имени
    Кешеләр төрле, фикерләр дә төрле. Сурәтен кем нинди ният белән куя, белеп булмый. Әмма актык сүзләр язып, кешегә пычрак ыргытулар бар, хак булса да актыгын әйтеп бетермә. Әйтмәсәң ишетмәссең дигән бит.Артистларның да һәр адымнарын соц.челтәргә куеп торулары кемгә кирәк?! Чаманы югалтмасак әйбәт булыр иде.
  • 28 гыйнвар 2020 - 21:55
    Без имени
    Баш мөхәррирегез бн килешмим, бик акыллы булып кылана. Инстаграмда да бар куз яше. Ничек бирәсең бит. Кешедән көлмибез дә, пычрак та атмыйбыз, уз фикеребезне генә белдерәбез
  • 28 гыйнвар 2020 - 21:48
    Без имени
    Инстаграмда үзеңнең фотоларыңны мактану максатыннан кую гөнаһ, диде әле бер хәзрәт.Чит илгә барган кеше, инстаграмда моны күрсәтми калмый. кыйммәтлерәк әйбер алса да, инстада урын ала. Бу тәккәбберлек билгесе икән, башкаларда хөсетлек уятырга мөмкин.Элек инстаграм булмаган. Социаль челтәрләр вакытны күп ала. Шундагы матурлыкка алданып, вакыт әрәм итеп утырабыз инде. Югыйсә, шул вакытны гаилә, якыннарың белән уздырырга була. Тере аралашу юкка чыгып бара. Үзебездән сизмәстән инстаграм колына әйләнә барабыз(( кызганыч...
  • 28 гыйнвар 2020 - 21:41
    Без имени
    Бик дөрес мәкалә, кеше мине белмиләр дип виртуаль дөньяда икейөзлеләнә шул
  • 28 гыйнвар 2020 - 21:28
    Без имени
    килешеп бетмим. ихлас, гади кешеләр дә бар инстаграмда. шәһридә чыккан блогер авыл апаен күзәтеп барам. эчкерсез кеше. Кылану юк, ясалмалык юк. Кызларым дип эндәшүе үк гади авылча.
  • 28 гыйнвар 2020 - 21:16
    Без имени
    Аптырыйм мин җырчылар адресына пычрак сүзләр язучыларга. Иренмичә язып утыралар бит әле. Әнә Зәмирәгә колхозница дигәннәр. Иренең яшь булуына да төрттермичә тыныч кына йоклый алмыйлар. кешенең кәефен бозып, үзләренең күңеле күтәреләме икән инде. Леронның серләшик аккаунтына яшь кызлар киңәш сорап яза. эт сөяк көтеп торган кебек, тотыналар шуларга ырылдарга. Матур төпле киңәш бирәсе урынга. Нишләп без кешеләр шулкадәр явыз. бер-беребезгә карата йомшак, ягымлырак булыйк әле!
  • 26 гыйнвар 2020 - 10:58
    Без имени
    Тормыш матур анда... Сэхнэдэ купшылану, урамга, кеше арасына чыкканда матуррак киенеп чыгу, матурлык салоннары - матурлыкка омтылу. Минемчэ, виртуаль тормышта гына тугел, реаль тормышта да матур булып куренэсе килу гадэти хэл. Э эчке донья куренми инде ул... Сэнгать кешесе сэхнэгэ эче тулы кайгы-хэсрэт белэн менеп елмаю, матурлык булэк итэргэ момкин. Инстаграмда шатлыклы минутларны чагылдыру табигый хэл. Урамга чыксан кэефсез йозлэр, кредитка баткан авыру жэмгыять... Инстаграмда гына булса да матурлык булырга тиештер бит инде. Сэхнэдэ дэ бит ясалма матурлык. Табигыйлык юк. Кая сон ул табигыйлык сезненчэ? Ярый эле матур мизгеллэр бар. Шул кадрларны кеше инстаграмында саклый, уртаклаша... Авырулар, иман зэгыйфьлеге, чарасызлык ыржаеп тормасын, матур, елмайган фотолар артына каплансын... Шулай яши кеше. Сер бирми. Чыдам халык бит бездэ...
  • 25 гыйнвар 2020 - 14:41
    Без имени
    Ин аянычлысы кешелэрне яхшылыкка ондэу тугел, киресенчэ телэсэ нинди гайбэтлэр таратып берсен - берсе тубэнсетергэ Тырыша. Киресенчэ дус тату бердэм булсак яшэргэ жинелерэк булыр иде. Михербанлылык, кешелелек дигән тошенчэ югалып бара.