Илсөя Бәдретдинова гармунчылар парадын җитәкләячәк

Бәйрәм концерты Г.Камал театры каршындагы мәйданда 11:00 сәгатьтә башланачак. Гармунчылар парады исә 14:00 сәгатьтә старт алыр дип көтелә. Ул Тукай скверы, аннан соң Бауман урамы аша Казан Кремленә кадәр дәвам итәчәк. 15:00-17:30 сәгатьтә Кремль Яр буенда “Уйнагыз, гармуннар!” концерты узачак.

Бөтендөнья татар конгрессының Башкарма комитеты җитәкчесе Данис Шакиров сүзләренчә, фестивальгә Татарстан һәм Россия төбәкләреннән 1000нән артык гармунчы киләчәк. “Алар арасында Башкортстан, Марий Эл, Удмуртия, Чувашия, Мордовия, Самара, Саратов, Пермь һәм башка төбәк гармунчылары бар. Фестивальнең географиясе елдан-ел киңәя бара. Бу фестиваль генә түгел, ә халык бәйрәме”, - ди ул.

“Уйнагыз, гармуннар!” фестиваленең үзенчәлеге шунда: биредә профессиональ гармунчылар белән бергә үзешчән гармунчылар катнаша. Актанышта яшәүче Илдус Харунов “Баламишкин” гармунчылар ансамблен җитәкли. Ул да “Уйнагыз, гармуннар!” бәйрәменә киләчәк. “Мин ел да бу фестивальдә катнашам. Профессиональ гармунчылар белән бергә катнашу – минем өчен зур дәрәҗә”, - ди Илдус. Аның әйтүенчә, быел “Баламишкин” ансамбле ТР Мәдәният министрлыгының Грантын отып, ансамбльдәге кешеләргә 16 костюм тектергән. “Күптән түгел безнең ансамбльгә халык исеме бирелде”, - ди Илдус Харунов.

Сүз уңаеннан, “Россия 1” каналында “Уйнагыз, гармуннар!” дип исемләнгән яңа тапшыру чыга башлады. Аны журналист Айзилә Батырханова белән танылган гармунчы Наил Сәгъдиев алып бара. “Тапшыруның максаты – авылларда яшәүче үзешчән гармунчыларны барлау. Татар милләтен дин, тел, моң һәм гармун саклый. Гармун – безнең канда. Әле гармунның шул ягы да бар: гармунда уйнау – сәламәтлек өчен файдалы”, - ди Наил. 

“Уйнагыз, гармуннар!” фестивалендә “Түгәрәк уен” Бөтенроссия фольклор фестивале лауреатлары да чыгыш ясаячак. Унбишенче тапкыр үткәрелүче әлеге фестиваль 28-30 августта Татарстанның 8 районында узачак. Бу – Арча, Буа, Кукмара, Алабуга, Минзәлә, Мөслим, Чирмешән, Яшел Үзән районнары. “Түгәрәк уен”га 14 төбәктән 300гә якын кунак килер дип көтелә.