#Язмалар 17 ноября 2018, 13:43

«Һөнәр»дән «Алтын битлек»кә бер адым

17 ноября 2018, 13:43

2-9 декабрь көннәрендә Казанда X «Һөнәр» Бөтенроссия фестивале үткәреләчәк. Быел фестиваль Бухарест, Мәскәү, Санкт-Петербург, Уфа, Ижау, Әлмәт, Минзәлә, Буа һәм Казан шәһәрләрендә эшләп иҗат иткән яшь режиссерларны тәкъдим итәчәк. «Һөнәр» фестивалендә катнашкан спектакльләр Камал театрының Зур һәм Кече сәхнәсендә, Яшь тамашачылар (ТЮЗ), Кариев театры, «Угол» иҗат лабораториясе һәм элеккеге Үзәк ЗАГС бинасы мәйданнарында күрсәтеләчәк.

Скопировать ссылку

«Һөнәр» фестивале яшьләргә нәрсә бирә соң? Ни өчен режиссерлар әлеге фестивальдә үз эшләрен күрсәтергә чиратка баса? Фестивальнең программа директоры – Камал театрының әдәби бүлек җитәкчесе Нияз Игъламов сүзләренчә, иң беренче чиратта бу – яшьләргә үз-үзен күрсәтү мөмкинлеге.

– Ун ел элек театрларда бер генә яшь режиссерга да үзлегеннән спектакль куюны ышанып тапшырмыйлар иде. 2009 елларда Фәрит Бикчәнтәев (Камал театрының баш режиссеры) беренче профессионал драма театры режиссерлары курсын укытып чыгарды. Моңа кадәр татар театрында андый режиссерлар юк иде әле. Менә шунда ул беренче тапкыр «Һөнәр» фестивален оештырды. Үз курсыннан тыш, читтән тагын ике яшь режиссер чакырды. Бер тапкыр гына буласы чара шулай күтәрелеп, яшьләрнең иҗат мәйданына әверелде. Режиссерларның эшен ел саен дәрәҗәле театр тәнкыйтьчеләре бәяли. Аларның киңәшләрен тотып, яшьләр үз хаталарын төзәтә ала, инде яңа спектакльләр куярга тәҗрибә туплый, – ди Нияз Игъламов.

Фестиваль яшьләргә үсеш өчен трамплин да әле. Яшь режиссер Айдар Җаббаровны гына алыйк. «Һөнәр» фестивалендә ул беренче тапкыр «Дәрдмәнд» спектакле белән катнаша. Соңыннан Камал театрында Хәсән Туфан шигырьләре буенча куелган «Агыла да болыт агыла» спектакле белән уңыш казана. Узган елны ул Гаяз Исхакый әсәрләре буенча куйган «Тормышмы бу?..» спектакле быел «Алтын битлек» театраль премиясенә алты номинация буенча дәгъва кыла.

Драматур, режиссер Илгиз Зәйниев тә – «Һөнәр» фестивале кысаларында үз көчен сынап караган кеше. Быел, фестиваль кысаларында, аның өч спектаклен карап булачак. Илгиз шулай ук Чаллы шәһәрендә куйган «Сак-Сок» курчак спектакле белән «Алтын битлек» премиясе номинанты.

Быел шулай ук Денис Хөснияров (Санкт-Петербург), Алмаз Садриев (Минзәлә), Дмитрий Акриш (Румыния), Илшат Мөхетдинов (Уфа), Диана Сәфәрова (Казан), Туфан Имаметдинов (Казан) һ.б. яшь иҗатчыларның эшен күреп булачак.

«Һөнәр» фестивале кысаларында шулай ук «Коммерсант-Weekend» атналык газетасы күзәтүчесе, Театр тәнкыйтьчеләре ассоциациясе әгъзасы Ольга Федятина (Мәскәү) замана Европа театры, драматургиясе һәм Бертольд Брехт иҗатына багышланган осталык дәресләре үткәрәчәк.

Фестивальдә 35 яшькә кадәр булган режиссерларның спектакльләре яки ул яшьне узган булса да, режиссерның дебют эшеннән соң биш ел дәвамында куелган спектакльләр катнаша ала. Тамашачылар игътибарына соңгы ике театраль сезонда куелган спектакльләр, премьералар тәкъдим ителә.