Шәһри Казан

Римма Ибраһимова: «Мин идеаль әби түгел»

Римма Ибраһимова дигәч, минем өчен никтер гел аның башкаруында «Бишек җыры» колагымда яңгырый. Беркайчан да үзгәрми торган, кечкенә генә буйлы, әмма искиткеч талантлы бу ханымга чибәрлекне дә табигать «вагоны белән» өеп биргән. Юкка гына аны Мәскәү кадәр Мәскәүгә җибәреп укытып кайтармаганнардыр.

Югалган бит – Мәскәүгә билет

Римма ханым кечкенәдән җырчы булырга хыялланмаган, әмма очрак­лык, язмыш бу талантка югалырга юл куймаган.

– Хыялланып яшәмәдем дип әйтү дөрес тә түгелдер. Мин бит кечкенәдән җырлыйм. Концертларда, укытучылар концертлар куйганда да, районнардагы смотрларга, фес­тивальләргә чакыралар иде. Әти-­әни дә бу һөнәрне сайлауны бик хуплап бетермәде. Шуңа да җырчы булу теләге белән яну сүлпәнрәк булгандыр, – ди Римма Ибраһимова.
Аның абыйлары, әти-әтисе бик матур җырлый торган булган. Әтисе гармунда уйнаган. Шулай булуга да карамастан, булачак халык ­артисты Казан дәүләт университетының тарих факультетына керергә ниятли. Ләкин беренче имтиханнан соң «имтихан бите»н югалта һәм керә алмыйча кала. Моны очраклылык, язмыш дип атамыйча, тагын нәрсә дия­сең инде?!

Шул елны Г.Тукай исемендәге Татар дәүләт филармониясенә төркем җыя башлыйлар. Максатлары – яшь талантларны Мәскәүдә эстрада буен­ча укыту. Йөзләгән кеше арасыннан башкалага Клара Хәйретдинова, Зиннур Нурмөхәммәтов, Рабига Сибгатуллина, биючеләр – барлыгы 14 кеше сайлап алына. Араларында Римма ханым да була.

– Бу конкурсны оештыручыларга мин бик рәхмәтле. Шул бәйге нәтиҗәсендә мин Мәс­кәүгә китеп, артист булып кайткан кеше. Бу юлны сайлаганга үкенү, һөнәр алыштыру теләге башыма да кергәне булмады. Аннан бик күп нәрсәгә өйрәнеп кайттык. Безне хәтта сәхнәдә үз-үзеңне ничек тоту, арканы төз итеп йөртү өчен биючеләрне өйрәткәндә генә кулланыла торган «станок» янына бас­тырып өйрәт­теләр. Индивидуаль дә­ресләрдән соң спорт дә­ресләре була иде. Анда шул кадәр әзерләделәр: кирәк булса, цирк­та да эшли алыр идек, – дип җылы итеп искә ала студент елларын җырчы.

«Татарлар елап озата иде»

Мәскәүдән кайткач та укуын туктатмый ул. Башта Казандагы училищеда белем ала, аннан исә Мәдәният институтын тәмамлый.

– Без ул чорда күп түгел идек. Мәскәүдән укуны тәмамлап кайт­канда, Әлфия апа, Илһам абый һәм тагын берничә төркем бар иде. Укып кайтканнан соң барыбыз да бригадабыз белән эшли башладык, – ди Римма ханым.

Халык артисты Советлар Союзын аркылыга-буйга йөри. Кая барса да, сибелгән татар халкы аны сөенеп каршы ала. Моннан тыш Римма Ибраһимовага Польша, Финляндия, Төркия, Венгрия, Чехословакиядә чыгыш ясарга туры килә. Бер интервьюсында җырчы, Финляндия­дәге чыгыш аеруча да истә калды, ди. Чөнки татар музыкасына, татар мохитенә сусаган милләттәшләр аны елап, шул ук вакытта җырлап-биеп озатып кала.

Реклама

– Без май аенда чыгып китә идек тә гастрольләрдән август ахырында гына кайтып керә идек. Татарстан буенча да, чит төбәкләрдә дә күп йөрдек. Үзбәкстанда гына да әллә ничә булдык, – ди җырчы.
Бу кадәр күп чыгыш ясаган җыр­чының репертуары да бай һәм эчтәлекле булырга тиеш, билгеле. Аның башкаруында «Гөлҗамал», «Сибелә чәчәк», «Су буйлап», «Әгәр белгән булсам» җырлары халык теленнән төшми.

– Әле күптән түгел килеп әйттеләр үземә. Римма апа, сезнең башкаруыгызда «Бишек җыры»н куябыз да балага, бик тиз йокыга китә. Бернинди мәшәкате юк, рәхмәт сезгә, диләр. Аның җыры бик матур. Сүзләре дә йөрәккә ята торган, баланы тынычландыра торган бит, – ди җырчы.

«Малай на белом барсе»ны рәхәтләнеп тыңладым»

Җырчы булуы өстенә хәзер яшь артистлар әзерләүче педагог буларак, Римма Ибраһимова замана сәхнәсен дә актив күзәтеп бара.
– Үзең укытучы булгач, эстраданың хәзерге хәлен дә, сәнгатьнең ни хәлдә икәнен дә белергә кирәк. Укытканда да балаларга сәхнәдә нәрсә ярый, нәрсә ярамаганын төшендерәсең. Безнекеләр – Мәскәүдән, Мәскәү чит илдән үрнәк ала. Элек бездә чит ил музыкасы тыела иде бит. Әмма аны барыбер төрле юллар белән, төнлә радио челтәреннән табып тыңлыйлар иде. Аннан дөнья ачылып китте дә, җырчылар да, тамашачылар да нәрсәне сайларга, кулланырга, дип аптырап калды. Аннан халык та бик шаккатмый башлый. Хәзер күңел үзенекен таләп итә. Хәзер бездә хәлләр бик начар дип әйтмәс идем, – дип бәяли Римма Ибраһимова.
 Гел халыкчан җырлар гына җырлап булмый, тамашачы төрлелек сорый, дип саный ул.

– «Малай на белом барсе» җыры бар бит әле. Бер көнне мине «Татарча солянка» концертына чакыр­дылар. «Зәңгәр шәл»не заманча итеп куйганнар иде. Үзем дә шул «малай»­ны рәхәтләнеп тыңладым. Рәхәтләнеп бии торган җыр. Мин аның бернинди куркынычын тапмыйм. Сәхнәдә андый җырлар да булырга тиеш, – ди Римма Ибраһимова.
Халык артисты Энҗе Шәймурзина, Сөмбел Билалова, Ильвина, Ришат Фазлыйәхмәтов кебек артистларны сәхнәгә әзерләгән кеше.
– Мин классик музыкага өйрәтәм, академик музыка укытмыйм. Хәзерге эстрадада җырлый алырлык, вокалның нәрсә икәнен белеп, дөрес итеп җырларга да өйрәнеп чыга торган артистлар әзерлим, – ди үзе.

«Ләйләгә сәләт табигатьтән килә»

Җырчы, укытучы гына түгел, ­Римма Ибраһимованың әни һәм дәү әни дә булуын онытмаска кирәктер. Инстаграмда «Йәйә» буларак танылган Ләйлә Таишева – Римма ханымның улы Фәрит Таишев һәм җырчы Ландыш Нигъмәтҗанова кызы икәнен дә күпләр белә.

– Ләйлә үзе дә мин артист булам, мин укытучы булам, дип йөри. Инстаграмда чыга башлагач, борчылган да идем. Ландыш өйрәтеп сөйләтәме икән аны. Өйрәтсәң дә, ул кадәр «кырт» кисеп, барысын да истә калдырып сөйли алмас иде. Ул – үзе артист. Аңа бирелгән сәләттер бу. Мин үземне идеаль әби дия алмас идем. Укыткач, эшләгәч, онык­лар белән балаларга бик ярдәм дә итә алмыйм. Мин кодагыйга бик рәхмәтле. Ул яктан Ландышка бик ярдәм итә. Өч бала белән бик җиңел түгел. Булдыра алганда, мин дә барырга тырышам, – ди Римма Ибраһимова.

Сүз уңаеннан, киләсе елда Татарстанның халык артисты 70 яшьлеген бәйрәм итәчәк. Юбилейга әзерлек эшләре инде хәзер үк башланган. Сүз уңаеннан, Г.Тукай исемендәге Татар дәүләт филармония бакчасында җырчы хөрмәтенә чыршы агачы да утыртылды.

Лилия ЛОКМАНОВА
 

Нравится
Поделиться:
Реклама
Комментарии (0)
Осталось символов: