Шәһри Казан

Рөстәм Миңнеханов: "Без "Сәләт"кә зур өметләр баглыйбыз"

Татарстан Республикасы Президенты Рөстәм Миңнеханов «Сәләт» XI халыкара яшьләр белем бирү форумының бишенче сменасында булды. Смена Биләрдә 27 июльдән 31 июльгә кадәр бара. Ул мәгълүмати технологияләргә багышланган. Чакырылган экспертлар катнашында бай мәгариф программасы кысаларында катнашучылар алдынгы IT-технологияләр һәм трендлар белән танышачак. Сменада 1077 бала катнаша.

ТР яшьләр эшләре министры Тимур Сөләйманов белән бергә, Рөстәм Миңнеханов форумның фестиваль мәйданчыкларын карады. Аерым алганда, ТР Президенты форумда катнашучыларны уен формасында татар халкының гореф-гадәтләре белән таныштыра торган остаханәдә, робот техникасын өйрәнү буенча белем бирү лабораториясендә һәм киләчәкнең перспективалы һөнәрләренә багышланган тематик сессиядә булды. Шулай ук Рөстәм Миңнехановка балалар өчен актерлык осталыгы, каллиграфия сәнгате буенча махсус мастер-класслар оештыру һәм спорт ярышлары турында сөйләделәр.

Җирле видеостудиядә Рөстәм Миңнеханов бераз интервью бирде. Ул билгеләп үткәнчә, бүген республикада татар телен, милли гореф-гадәтләрне һәм мәдәниятне саклауга һәм үстерүгә зур игътибар бирелә. Бу эшкә «Сәләт» хәрәкәте зур өлеш кертә. «Без «Сәләт»кә зур өметләр баглыйбыз. Бу – татар халкының киләчәгенә бәйле проект», - диде ТР Президенты. Ул шулай ук Татарстанда туган телләрне өйрәнү өчен барлык шартлар да тудырылуын билгеләп үтте. Шул ук вакытта татар, чуаш, мари, удмурт һәм башка халыкларның телләре дә бар.

Аннары Рөстәм Миңнеханов төп сәхнәгә күчте һәм сменада катнашучыларны сәламләде. «Сезнең белән чираттагы очрашуыма бик шатмын. Биредә бик күп үзгәрешләр булган. «Сәләт» алга бара, үсә. Бүген монда яңа күнекмәләр алырга, кызыклы нәрсәләр белергә була», - дип ассызыклады Татарстан Президенты.

Рөстәм Миңнеханов билгеләп үткәнчә, бүген «Сәләт» линиясе буенча берничә перспективалы проект гамәлгә ашырыла. Шулай итеп, июль башында Кырымда «Сәләт – Акбарс» яңа лагереның беренче сменасы ачылган. «Адымнар» мәктәпләрендә укыту-тәрбия процессында берләшмәнең белем бирү методикаларын кулланучы «Сәләт»нең махсус сыйныфлары ачылган. «Әлбәттә, без боларның барысын да татар телен, гореф-гадәтләребезне саклап калу өчен эшлибез. Бу юнәлештә «Сәләт» хәрәкәте зур эш алып бара. Без моны бик югары бәялибез һәм сезгә ярдәм итәчәкбез», - дип өстәде Рөстәм Миңнеханов.

Реклама

Шулай ук Биләргә визиты кысаларында Рөстәм Миңнеханов Биләр музей-тыюлыгы территориясендә археологик казу эшләре белән танышты һәм «Биләр Страусы» эко-фермасында булды. Эко-ферма проекты авыл туризмын үстерү кысаларында тормышка ашырыла.

Белешмә өчен:

«Сәләт» XI халыкара яшьләр белем бирү форумы 26 июньнән 8 августка кадәр Биләр тарих-археология музей-тыюлыгы территориясендә уза. Быел форум Татарстан Республикасының барлык районнарыннан һәм Россиянең кайбер төбәкләреннән 6300 баланы берләштерәчәк.Барлыгы алты смена оештырылачак. Проект Татарстан Президенты ярдәме белән тормышка ашырыла.

ТР Президенты Матбугат хезмәте

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: