Рөстәм Миңнеханов: "Һәр халык үзенең тарихын, нәселен белергә тиеш"

Камал театры сәхнәсендә Актаныш, Әлмәт, Балтач, Казан, Нурлат, Тәтеш районнарыннан 6 гаилә үзләре белән якыннанрак таныштырды. Балтач районы Кариле авылыннан Мулланур һәм Гөлсем Миңнебаевлар гаиләсе “Без тарихта эзлебез” бәйгесендә беренчелекне яулады.

Театр фоесында оештырылган күргәзмәдә дә һәрбер гаиләнең үзенчәлекле якларын, нәсел байлыкларын, югалту-табышларын күрергә була иде. Алар янында узган берничә сәгатьтә шушы гаиләләрнең традицияләрен генә түгел кунакчыллык, туган җанлылык, олыларга хөрмәт күрсәтүләрен дә тоярга өлгердек без. Шәҗәрә бәйрәменә һәрбер  нәсел әби-бабайлар, бала-чагалар белән килгән иде. Бәйгенең төп шарты булган нәсел шәҗәрәсен төзү һәм аны тәкъдим итүне дә һәркем аерым бер мәгънә салып күрсәтте. Мәсәлән, Гөлсем Миңнебаева нәсел шәҗәрәләре белән күптәннән кызыксына.  

– Бу нәселне егерме ел эзлим, өйрәнәм. 2020-2021 елларда шәҗәрә агачы төзеп, монда алып килдем. Киров архивына барып бер атна тордык. Йошкар-Ола архивында эзләдек. Үзебезнең Казани архивларын әлә кайчан тикшердек инде. Митрикәләрне Уфадан алдырттык. Петербург архивларына сораулар җибәрдек, – дип сөйли Гөлсем ханым. Аның әйтүенчә, шәҗәрә агачы һәрбер өйне бизәп торырга тиеш. 

Җиңүчеләрне республика Президенты Рөстәм Миңнеханов та алкышлады.
– Һәммәгезне дә бүгенге бәйрәм белән котлыйбыз. Беренчедән, гаилә бәйрәме. Икенчедән, шушы бәйге бәйрәмне көчәйтте. Бик эчтәлекле чыгышлар күп булды. Барысы да бик матур әзерләнгәннәр, һәммәсе үрнәк булырлык. Бу бәйге безнең өченче ел бара. Узган ел пандемия бәйле авыррак булды. 102 гаилә республика буенча катнашты, барысы да монда килеп җитә алмады. Без аларга да рәхмәт әйтик. Без бу конкурсларда үзебезнең киләчәгебезгә ниндидер бер нигез салып куябыз. Әгәр дә без үзебезнең балаларга, яшьләргә шушы традицияләрне, гореф-гадәтләрне күрсәтмәсәк, тарихны белмәячәкбез. Бу татар милләтенә генә кагылмый. Биредә төрле милләт гаиләләренең чыгышлары булды. Һәрбер халык үзенең тарихын белергә тиеш. Глобализация барышында  гаилә төшенчәсе юкка чыгып барганда, анда ир дә, хатын да юк. Шуңа да без үзебезнең гореф-гадәтләргә, традицияләргә бик сак карарга тиеш, тарихыбызны сакларга кирәк – шуның белән без көчле. Тарихыбызны-нәселебезне барларга, безнең буында төрле шәхесләр булган белергә – ул безнең киләчәгебез бар дигән сүз, –– диде Татарстан Президенты. Алга таба да шушы бәйрәмне оештырган кешеләргә аерым рәхмәтен белдерде ул. Киләчәктә дә бу эшне матур итеп алып барырсыз дип ышанычта калуын әйтте. 

Шулай итеп, Балтач районы Кариле авылыннан Миңнебаевлар гаиләсе беренче урынны алды. Актаныш районыннан Мәсәлимовлар гаиләсен икенче урынны яулады. Өченче урынны Әлмәт районыннан Мотаһировлар гаиләсе алды. Бәйрәм азагында барча халыкның бергәләп “Туган тел” җырын җырлады.