Кыш бабайның бүләкләре әзер

Мәктәпкәчә мәгариф учреждениеләрендәге 59 мең 300 сабыйга, 1-4 сыйныфларда белем алучы 43 мең 800 укучыга, кадет мәктәп-интернатында укучы 320 балага, «Дәвалау педагогикасы һәм дифференцияле укыту үзәге» учреждениесендә шөгыльләнүче 170 малай һәм кызга бүләкләр таратылачак. Кыш бабай бүләкләреннән бакчаларга һәм мәктәпләргә бара алмаучы 3 яшьтән 14 яшькәчә булган инвалид балалар һәм күп балалы гаиләләрдәге 3 яшьтән 6 яшькәчә булган нарасыйлар да читтә калмаячак.
«Татнефть-Арена» спорт комплексында 25 декабрьдә республикакүләм Чыршы бәйрәме уздырылачак. Әлеге чарага балалар иҗтимагый оешмалары укучы-әйдаманнары, уку отличниклары, олимпиадалар җиңүчеләре һәм җәмәгать эшләре активистлары чакырылачак.
Быелның 25 декабреннән киләсе елның 8 гыйнварына кадәр барачак кышкы каникул чорында башкалада 150 мәктәп яны лагере эшләячәк. Аңа 7 мең 170 бала йөреячәк. Мәктәпләрдә, өстәмә белем һәм мәдәният үзәкләрендә балалар конкурсларда, викториналарда катнашачак. Юлламаның тулы бәясе 875 сум. Ата-аналар шуның 131 сум 25 тиен өлешен генә түли. Каникулда балаларга 400 мәдәни һәм 125 спорт чарасы оештырылачак.