Рөстәм Миңнеханов: «Каравон» җитди брендка әверелде, аны Россиядә дә беләләр» (ФОТОРЕПОРТАЖ)

Иртәгесен Никольскийга агылган халыкны да гөрләп торган авыл каршылады. Бәйрәмгә барлыгы 160 коллектив (шуларның 12 се Россия төбәкләреннән), 340 кулланма гамәли сәнгать осталары җыелды. Тамашачыларның да саны-исәбе юк иде. Бәйрәмгә Татарстан Президенты Рөстәм Миңнеханов та килде. Мәртәбәле кунакларны фольклорчылар тере коридор ясап, ипи-тоз белән каршы алды. Фестиваль башланганчы Рөстәм Миңнеханов кулланма гамәли сәнгать осталары ярминкәсен карап чыкты, һөнәрчеләр белән аралашты.

Муром ягының Мишино авылыннан килгән һөнәрченең аяк белән басып эшләтә борынгы уклы токарь станогы Президентта аеруча зур кызыксыну уятты булса кирәк.

- Бу станок турында беренче тапкыр безнең эрага кадәр 400 ел элек телгә алынган. Әлеге станок миңа бабамнан мирас булып калды. Эшләргә берәү дә өйрәтмәде, барысын да үзем торгыздым. Бу станок инде өч ел эшли. Электр станогында, тизрәк эшләнсә дә, күңел шушыңа тарта, моның ниндидер җылысы бар, - ди һөнәрче.- Үземне белгәннән бирле ни дә булса эшлим. Нәрсә күрсәм дә, шуны итекче пычагы белән юна торган идем. Шуны бабай күрде дә, дөрес итеп пычак тотарга өйрәтте. Кан үзенекен итә. Бабай мич чыгарган, мин дә тартылам бу эшкә, ул атлар яраткан, мин дә яратам. Ә "Каравон"га биш, алты ел рәттән киләм инде. Бу - Татарстанның табышы.

Ә менә шарманкасын уйнатып, халыкның күңелен күреп торган композитор, автор-башкаручы Дмитрий Бикчәнтәев үзен хәерче дип таныштырды. Алдына куйган кәләпүшенә үткән-сүткән акча да салгалады. Аңа карап кына баемады, әлбәттә, музыкант. Әлеге шарманканы Америкадан алып кайтуына биш-алты ел икән.

Бәйрәм зур сәхнәдә фестивальнең, авылның тарихы белән бәйле тамашадан башланып китте.
- "Каравон" җитди брендка әверелде. Аны инде республикада гына түгел, Россиядә дә беләләр. Әлбәттә, бу бик халыкчан бәйрәм. Биредә безнең тарихыбыз, безнең гореф-гадәтләребез. Мөселман йолаларымы ул, православиенекеме - без тарихка, йолаларыбызга бик сак карыйбыз. Кичә Болгарда зур бәйрәм - Изге Болгар җыены булды, бүген бөтенебез бер булып "Каравон" ны билгеләп узабыз. Бу безне берләштерә, бер-беребезгә якынайта. Әлеге фольклор бәйрәме республиканың мөһим казанышларының берсенә әверелде, - диде Президент ачылыш тантанасында.

Бәйрәм кунакларын зур концерт программасыннан тыш "Камаринская", "Завалинка" кебек милли йолаларга нигезләнгән тематик мәйданнар, төрледән-төрле ишегалды уеннары, квестлар көтә иде. Шул ук вакытта театраль "Балаганчик", "Халык модасы", "Күл буендагы киносеанс"лар да һәм, әлбәттә инде, авыл буйлап сузылган ярминкәләр дә тамашачы игътибарыннан читтә калмады. Бәйрәмнең иң зур кунагы Липецк шәһәреннән «Казаки России» бию театры булды.

^{Автор фотолары.}