Татарстанда ясалган лифтларны куллана башлыйбыз

Без булдырдык!
Россия төбәкләре арасында беренчеләрдән булып, Татарстан 2004 елда торак һәм коммуналь хуҗалыкны төзекләндерүгә керешкән иде. 2007 елның июлендә кабул ителгән “Торак-коммуналь хуҗалык реформасына теләктәшлек фонды турында”гы федераль канун эшнең колачын тагын да киңәйтергә мөмкинлек бирде. 

– Торак йортларны төзекләндерүгә Татарстанның беренче Президенты Минтимер Шәймиев старт биргән иде. Шул вакытта ук зур эшләр башкарылды, – дип искә төшерде республиканың төзелеш, архитектура һәм торак-коммуналь хуҗалык министрының беренче урынбасары Алексей Фролов.

Торак йортларны төзекләндерү буенча эшчәнлектә Татарстан инде билгеле бер тизлеккә ирешкән була. Шунлыктан, республика федераль проект кысаларында каралган 6 миллиард 652 миллион сумны 2008-2009 еллар эчендә үк “эшкә җигеп бетерә”.

Татарстан 44 республика программасын гамәлгә ашыра. Күп фатирлы торак йортларны капиталь төзекләндерүгә ел саен 6 миллиард сумнан артык акча тотыла. 

– Капиталь төзекләндерү инде хәзер үзебезнең хисаптан гына башкарыла, федераль бюджеттан акча күчерелми. Финанс чыганакларының 60 проценты – милекчеләр түләүләре, ә 20 проценты – республика бюджеты һәм 20 проценты муниципалитетлар чыганаклары. Капиталь ремонт өчен торакның һәр квадрат метрыннан 7 сум 70 тиен түләү туплана. Бу таләпне һәр йортның да башкаруы зарур, – диде Алексей Фролов.
Быел капиталь ремонт программасына күп фатирлы 766 йорт алынган. Моның өчен 8 миллиард 468 миллион 512 мең сум акча тәгаенләнгән. Ләкин, 3 йортның милекчеләре “капиталь ремонт үткәртергәме, әллә үткәртмәскәме?” дип, һаман бер уртак фикергә килә алмыйча йөри икән. Күп фатирлы 600 йортта төзекләндерү эшләренә керешелгән.

– Алга таба күп фатирлы йортларга Татарстанның Яшел Үзән шәһәрендә ясала торган лифтларны да урнаштырачакбыз. Белоруссиядән дә лифтлар кертү дәвам итә, – диде Алексей Фролов.

Казанда октябрь аенда узачак БРИКС саммитына әзерлек кысаларында биналар, урамнар, парклар төзекләндерелә. Алексей Фролов әйтүенчә, саммитка кагылышлы әзерлек эшләрен Татарстан Рәисе Рөстәм Миңнеханов шәхсән үзе күзәтчелектә тота.