Тимер юлда «терминатор» булып кыланма

“Татар-информ” мәгълүмат агентлыгында узган матбугат конференциясендә Горький тимер юлының баш инженеры урынбасары Евгений Ананьин әйткәнчә, быел тимер юлның Казан төбәгендә 25 кеше зыян күргән- шулардан 19 кешенең гомере үк өзелгән. Тимер юлда үлгәннәрнең дүртесе-балалар.

Горький тимер юлы дирекциясе тырышлыгында узган ел Заструг-Сосновка, Ямное-Заструг, Зөя (Свияжск) станцияләрендә җәяүлеләр юл кичүләре төзелгән. Казан шәһәре белән берлектә Новартолар, Адмиралтия бистәсе, Левченко, 797нче километр, 795нче километр, Иске Аракчино, ЖБК-2, 804нче километр, Көнчыгыш парк, Вахитов, Әмәт, Лагерная, Дәрвишләр тукталыш платформаларына килә торган юллар, Копылов урамындагы баскыч-сукмак төзекләндерелгән. Лагерная белән Әмәт станцияләрендәге җәяүлеләр юл кичүләрен төзекләндерү быелгы планлага кертелгән. Восстание станциясендә, Дәрвишләр-Киндери участогында җәяүлеләр юл кичүләре төзелә.

— Ни кызганыч, мөмкинлекләр тудырылган килеш тә, кайбер кешеләр тимер юллардан йөрүләрен дәвам итә, янәшәсендәге җир өсте яки җир асты кичүләреннән файдаланмый. Исерек хәлдә тимер юллар өстендә йөрү аеруча хәвефле, - дип искәртте Евгений Ананьин.
Яшел Үзән станциясендә 16 мартта ике үсмер малай вагон-цистерна өстенә менгән. Беренче малайны электр тогы суккан, икенчесе-тән пешүләре алган, егылып төшкәндә баш мие селкенгән. Алар икесе дә Яшел Үзән шәһәренең 4нче мәктәбе укучылары булган.

— Әмәт-Дәрвишләр участогында поезд машинисты тимер юл читендә басып торган кешене күреп алып, тавыш сигналлары бирә. Тик теге кеше читкә тайпылмый, нәтиҗәсе-бәрдерү. Машинист никадәр генә тырышса да, поезд составын туктата алмый. Кискен туктату ярамый да: 800 кешеле поезд яки төрле эчтәлектәге йөк вагоннары юлдан мәтәлергә һәм тагын да зуррак фаҗига тудырырга мөмкин. Бу участокта бәрдерелгән кеше Вахитов районындагы 80нче гимназия укучысы булган, - дип искә төшерде Евгений Ананьин.

Исегездә тотыгыз:
 Тимер юл аша теләсә-кайсы урыннан чыкмагыз, телефоннан сөйләшмәгез һәм музыка тыңламагыз, кулчатыр тотып бармагыз;
 Тимер юлда ачык кичүдән чыкканда як-якка карагыз: бер поезд узып киткәч, каршы яктан икенчесе килмәгәнлегенә инаныгыз;
 Тимер юл өстеннән атламагыз, тимер юлда һәм тимер юл читендә уйнамагыз;
 Пассажир яки товар вагоннары, цистерналар өстенә менү катгый тыела, чөнки бу адым үлемгә китерә;
 Вагонга ябышып бару, үзеңне фото-видеога төшерү хәвефле. Хәтта, сәгатенә 60 километр тизлек белән барган поезд вагоныннан тимер юлга егылып төшү дә үлем белән тәмамланачак.
 Поезд тәмам туктап беткәч кенә вагонга керергә яки чыгарга ярый;
 Вагоннар астына бервакытта да кермәгез, поезд кузгалса, чыгып өлгермәячәксез.
 Тимер юлларда иминлек кагыйдәләрен бозган өчен административ штрафлар каралган. Балиг булмаганнарга штраф аларның ата-аналарына салына.