1945 елда беренче Жиңү парадында катнашкан Өмет Гобәев “Милләт җыены”на килде

Ул хәзерге көндә Краснодар крае, Армавир шәһәрендә яши. Аңа апрель аенда 97 яшь тулган! Искәртеп узарга кирәк, Өмет Гобәев 1945нче елның 24нче июнендә Мәскәүдә Кызыл мәйданда Җиңү парадын ачкан. Ул вакытта музыка училищесы курсанты 17 яшьлек хәрби барабанчылар ротасында булган.

Өмет Садыйк улы Гобәев 26-28 август көннәрендә Казан шәһәрендә  “Татарстан – рухи Ватаным”  шигаре астында узучы “Милләт җыены”на килгән. Ул Татарстан башкаласына һәм халкына аерым хөрмәт һәм ярату хисен ассызыклый. Сүз уңаеннан, аның әнисе ягыннан әби – бабасы Татарстаннан, төгәлрәге Әтнә районыннан. Башкалабызда Өмет абыйның әле икенче генә тапкыр кунак булуы.

“Милләт җыенына” чакыру алгач, бик кайгырган идем. “Нишләрмен инде анда?”,– дип уйладым, ләкин бирегә килгәч, барысы да үзгәрде! Монда бик күп кешеләр белән күрештем, барысы да килеп кочаклый, кулымны кыса, мине күрүләренә барысы да бик шат. Хәзерге Казан мин ничә еллар элек күргән шәһәр түгел, Казан елдан-ел матурая, зурая. Нинди театр! Мондый театр бары тик Татарстанда гына була ала. Ә цирк нинди?! Безгә экскурсия үткәргәндә мин сокланып, шаккатып карадым, искиткеч! Монда килүемә бик шатмын, 29 августта кайтып китәм, инде сагына башладым. Икенче елга да киләм Татарстанга! Җәяү булса да киләм!», – дип сүзен йомгаклады Өмет Гобәев елмаеп.