26 февральдә Иҗтимагый палатаның «Остазлык мәктәбе» старт ала

Аларның профессиональ үсешенә ярдәм итү максатыннан, Татарстан Иҗтимагый палатасы 2023 елдан бирле «Социаль юнәлешле коммерцияле булмаган оешмаларның остазлык мәктәбе» проектын гамәлгә ашыра. Бу хакта Татарстан Иҗтимагый палатасының социаль мәсьәләләр һәм сәламәтлек саклау комиссиясе рәисе, «АК БАРС СОЗИДАНИЕ» хәйрия фонды директоры Әлфия Вәлиева журналистларга хәбәр итте.

— Мәгълүм булганча, коммерцияле булмаган оешмаларның нибары 30 процентында гына үсеш стратегиясе бар. Ә мондый документның булуы бик мөһим. 2023–2024 елларда узган беренче курс 120 оешмага алдагы өч елга исәпләнгән үсеш юлын билгеләргә мөмкинлек бирде. Башта без республикада эшләп килүче оешмалар белән генә хезмәттәшлек иттек, әмма инде киләсе елда проектка башка төбәкләрдән дә кушылучылар булды, — дип сөйләде ул.

26 февральдә Иҗтимагый палатада «Остазлык мәктәбе»нең идарәчелек компетенциясен үстерүгә юнәлдерелгән яңа курсы старт алачак.

— Безнең өчен белем бирү генә түгел, ә алынган күнекмәләрнең никадәр нәтиҗәле булуы һәм практик эшчәнлектә кулланылуы да мөһим. Нәкъ шуңа күрә быел бу күрсәткечләрне бәяләү максатыннан иҗтимагый премия булдырыла, — диде спикер.

Конкурста катнашу өчен гаризалар гыйнвар аенда кабул ителә башлады һәм 8 февральгә кадәр дәвам итәчәк.

Әсгать Галимҗанов исемендәге иҗтимагый премия 2 мартта — республиканың күренекле хәйриячесе Әсгать Галимҗановның тууына 90 ел тулган көндә тапшырылачак.

Премия лауреатлары дипломнардан тыш, үз командаларын ныгыту һәм үстерү өчен максатчан грантларга да ия булачак. Әлеге финанс ярдәме хезмәткәрләрне профильле укытуга, махсус чараларда катнашуга яки команда әгъзаларының сәламәтлеген ныгытуга юнәлтелә ала.