“Абилимпикс”ның 79 финалисты арасында 16сы – татарстанлылар

Билгеле булганча, чемпионатта илнең 79 төбәгеннән килгән хәрби хәрәкәтләр ветераннары 15 компетенциядә көч сынашты. 

– Әлеге проект махсус хәрби операциядә катнашу барышында инвалидлык алган ир-атларга социальләшергә һәм адаптацияләнергә ярдәм итә. Моннан тыш, Татарстан хакимияте предприятиеләр белән бергә махсус операциядә катнашучылар өчен эш урыннарын җайлаштыру мәсьәләсе белән дә шөгыльләнәчәк. Чемпионат барышында бу хакта да сүзләр булды. Безнең, хөкүмәт органнарының гына түгел, барыбызның да төп бурычы – алар янәшәсендә булу, – дип белдерде спикер чемпионатны уздыру йомгакларына багышланган матбугат очрашуында.  

Чемпионатта катнашучылар компетенцияләрнең санын арттыру фикере белән дә чыкканнар. Быел ул 15 компетенциядә узды, киләчәктә ул, махсус операциядә катнашучыларның спецификасы истә тотылып, тагын да киңәер дип ышанабыз, диде Ләйлә Фазлыева.

Спикер белдерүенчә, Татарстан Рәисе кушуы буенча, чарада катнашкан төбәкләр белән кире элемтә булдырып, чемпионат нәтиҗәләре буеча тулы анализ ясалачак. Шуңа карап, алда булачак чемпионатларга өстәмә үзгәрешләр, яңа эш формалары кертелергә мөмкин, диде ул.   

«Абилимпикс» чемпионатында Татарстанның 11 районыннан 25 кеше катнашкан. Унбиш компетенциянең унберендә чыгыш ясап, 16сы 79 финалист арасына кергән. Финалистлар 30 октябрьдән 3 ноябрьгә кадәр Мәскәүдә узачак “Абилимпикс” илкүләм чемпионаты финалында катнашыр дип көтелә. Алар әзерлекне инде хәзердән үк башлаганнар.  

«Ватанны саклаучылар» дәүләт фондының Татарстандагы филиалы җитәкчесе Гүзәл Удачина хәбәр итүенчә, республика районнарыннан чемпионатта иң күп катнашучылар Лаештан, Чаллыдан һәм Түбән Камадан булган. 

“Һөнәри компетенцияләрне үстерү үзәге” автоном коммерцияле булмаган оешмасы генераль директоры Эмиль Гобәйдуллин киләсе елга язга төбәк чемпионатын оештыру нияте барлыгын да белдерде.