Абхазиягә бару гадиләште: туристлар өчен “бердәм” билет тәкъдим ителде

Ул 30 сентябрьгә кадәр дәвам итәчәк.

Транспорт министрлыгы Абхазиягә "бердәм" билет системасы буенча пассажирлар ташу башлануы турында хәбәр итә. Хәзер сәяхәтчеләргә поезддан яки самолеттан соң икенче транспортка күчеп утыруны мөстәкыйль рәвештә планлаштырырга кирәкми, билет бәясенә инде тулы маршрут салынган. Адлерның тимер юл вокзалында һәм Сочи аэропортында күчеп утырырга була. Шуннан соң пассажирларны Абхазиянең биш популяр курортына, аерым алганда Гагра, Пицунда, Гудаута, Яңа Афон һәм Сухумга автобуслар белән китерәләр.
"Бердәм" билетны рәсмиләштерүнең ике варианты бар:

Поезд һәм автобус. Пассажир поездда Адлерның тимер юл вокзалына кадәр бара, аннары чикне уза һәм сәяхәтен Абхазия курортына кадәр автобуста дәвам итә.

Самолет һәм автобус. Сочи аэропортына кадәр самолетка билет сатып алырга, ә аннары курортка автобуста кадәр барып җитәргә мөмкин.
"Поезд һәм автобус" билетын теләсә кайсы тимер юл вокзалы кассаларында, шулай ук сайтта һәм Россия тимер юллары кушымтасында рәсмиләштерергә була. Онлайн-сатып алу вакытында маршрутның башлангыч һәм ахыргы пунктларын күрсәтергә һәм "күчереп утырулар белән маршрутлар" опциясен сайларга кирәк.

«Самолет һәм автобус» билеты партенерлык сервислары: онлайн авиабилетлар сатып алу сервислары һәм транспорт-туристлык агентлыклары кассалары аша рәсмиләштерелә.

"Бердәм" онлайн билет сатып алганда тимер юл яки авиабилетлар сатып алу битендә кайдан кая барачагыгызны күрсәтергә кирәк. Әйтик, "каян" - Казан / "кая" – Пицунда.

2026 елда «бердәм» билетның автобус өлешенең бәясе: Сочи – Гагра: 824 сум, Сочи – Пицунда: 910 сум, Сочи – Гудаута: 956 сум, Сочи – Яңа Афон: 1052 сум, Сочи – Сухум: 1132 сум тәшкил итәчәк.

32 еллык тәнәфестән соң, узган ел, Россия һәм Абхазия туры авиаэлемтәне яңарттылар. Әмма Казаннан Сухумга, вәгъдә ителгән булса да, рейслар җибәрелмәде.

Россия гражданнарына Абхазиягә бару өчен виза таләп ителми, Россия паспорты да җитә.

2025 елның 1 декабренә булган мәгълүматларга караганда, Абхазиягә Россиядән якынча 1,64 миллион турист килгән. Абхазия россиялеләр арасында иң популяр юнәлешләрнең берсе булып тора.