Алексей Песошин: «Татарстанда хезмәт базары киеренке»

Җиденче чакырылыш Татарстан Дәүләт Советының егерменче утырышында Татарстан Премьер-министры Алексей Песошин белдергәнчә, предприятие һәм оешмаларның кредитлар буенча түләү вакыты чыккан бурычлары һәм бурыч йөкләмәләре арта.

-         Табышның кимүе чыгымнар арту белән бергә бара. Чыгымның иң зур күләме «автотранспорт чараларын җитештерү», «күпләп һәм ваклап сату», «азык-төлек продуктлары җитештерү», «транспортировкалау һәм саклау» кебек тармакларда. Кайбер тармакларда без финанс тотрыклылыгының җитди куркынычларын күзәтәбез, бу исә яшерен эшсезлеккә, түләргә сәләтсезлеккә, салым бурычлары артуга, хезмәт хакын вакытында түләмәүгә китерергә мөмкин. Димәк, моның республиканың берләштерелгән бюджетының керем өлешен үтәүдә чагылыш табуы бар. Тармакларның нәтиҗәлелеген күтәрү, югары технологияле продукция күләмнәрен арттыру буенча системалы чаралар күрергә кирәк, - диде ул.

Билгеле булганча, Татарстанда «Эффектив һәм көндәшле икътисад» илкүләм проекты гамәлгә ашырыла.