Алты шәһәрне үз эченә алган су юлы буйлап даими рейслар оештырыла башлый

Рейслар 1 майда старт ала һәм 30 августка кадәр җомга, шимбә һәм якшәмбе көннәрендә заманча тизйөрешле "Метеор"да гамәлгә ашырылачак.

Маршрутның төп нокталары: Казан - Түбән Кама - Чистай - Түбән Кама - Алабуга - Чаллы. Проект туристлар өчен яңа мөмкинлекләр генә ачып калмый, республиканың эре сәнәгать һәм мәдәни үзәкләрен тоташтыручы тиз йөрешле транспорт коридорын да булдыра. Бу - чын мәгънәсендә тарихи проект, ул республика халкы өчен дә, туристлар өчен дә кызыклы булачак, дип белдерде журналистларга Татарстанның туризм буенча дәүләт комитеты рәисе Сергей Иванов. Аның әйтүенчә, әлеге уникаль маршрутны сайлаучылар өчен экскурсия программалары да булдырылган. Һәр шәһәрдә уникаль туристлык объектлары эшләп килә. “Чаллыга баручылар исә үзләре өчен аны яңа туристлык үзәге буларак ачачак”, - диде ул.  

Рейсларның расписаниесе шулай ук бик җайлы дип ышандырды. "Метеор-2020" судносы 120 пассажирга исәпләнгән, уңайлы җылы салон заманча коткару чаралары белән җиһазландырылган, дип ассызыклады спикер.

«Татарстан Республикасы флоты» генераль директоры Роман Лизалин да проектның көтелгән һәм республика өчен уникаль булуын билгеләп үтте.

“Навигация уртасында өстәмә рәвештә Кама Тамагына тукталуны да оештырачакбыз. Киләчәктә Балык Бистәсе дә маршрут керер дип торабыз”, - диде ул.  

Расписаниесенә килгәндә, җомга көнне 8.30да Казаннан кузгалып, 14.20дә Чаллы булачак. Икенче көнне, шимбә, 13.00дә Чаллыдан китәчәк. Шимбә көнне Казаннан шулай ук тагын бер судно юлга чыгачак. Ике судно да әзер”, - диде Роман Лизалин. Алга таба маршрут буенча аудиогид та эшләр дип көтелә.

Билгеле булганча, Татарстанда «Туризм һәм кунакчыллык» илкүләм проекты гамәлгә ашырыла.