Бәби көтү — могҗизага тиң мизгел: Азнакайда «Яшь әти-әниләр мәктәбе» очрашуы

Шуңа да бала безгә бик кадерле. Бала — әти-әнигә Ходай тарафыннан бирелгән иң зур бүләк.

Азнакай муниципаль районы ЗАГС бүлегендә «Яшь әти-әниләр мәктәбе» проекты кысаларында чираттагы очрашу узды. Ул Азнакай муниципаль районы хатын-кызлар советы, район хастаханәсе, мәдәният һәм дин оешмалары белән берлектә оештырылды. Очрашуның максаты — татар халкының милли-мәдәни мирасын саклау һәм баету, борынгылардан килгән гореф-гадәтләрне өйрәнү һәм аларны яшь буынга тапшыру.

Дәрес барышында ир белән хатын-кыз мөнәсәбәтләре, баланың исеменең аның язмышына һәм киләчәгенә йогынтысы, ана телендә сөйләшүнең әһәмияте, гореф-гадәтләрне өйрәнеп үсү, шулай ук яшь әниләр өчен нарасыйларны имезүнең никадәр мөһим булуы турында сөйләштеләр. Баланы биләүдән үк ана сөте белән тәрбияләү темасы да игътибар үзәгендә булды.

«Яшь әти-әниләр мәктәбе» Азнакай районы ЗАГС бүлеге һәм хатын-кызлар советы тарафыннан инде 10 ел дәвамында үткәрелә. Узган ел әлеге проект аеруча да киң колач алды — ул Татарстан Республикасы Рәисе Рөстәм Миңнеханов грантына ия булды. Бер ел эчендә Азнакайда 15 дәрес уздырылып, аларда 225 бала көтүче яшь гаилә катнашты. Ә гомумән алганда, Татарстан ЗАГСларында яшь ата-аналар өчен 2300дән артык очрашу оештырылды.

Татарстан Республикасы Министрлар Кабинетының ЗАГС идарәсе башлыгы Эльвира Әхмәтова билгеләп үтте:
«Ата-ана булу яшь гаилә тормышына зур үзгәрешләр алып килә. Бала туу шатлыгы белән беррәттән, ата-аналар алдында зур җаваплылык та арта. Шуңа күрә нәкъ менә бала көтү чорыннан ук гаиләләргә игътибар бирү аеруча мөһим».

Республикабызда яшь ата-аналарга зур игътибар бирелә. Яшь һәм күпбалалы гаиләләр уңай шартларда яшәсен, балаларын тиешле дәрәҗәдә тәрбияли алсын өчен барлык кирәкле шартлар тудырыла.

Фото: Азнакай ЗАГС бүлеге архивыннан