Балалары питбайклар белән авариядә зыян күргән әти-әниләргә карата җинаять эше кузгатылачак

Татарстан Дәүләт автоинспекциясе балигъ булмаганнарга питбайк һәм башка спорт техникасын тапшыру очракларына бәйле рәвештә әти-әнигә карата җинаять эшләре кузгату мәсьәләсен күтәрде.

Әлеге юнәлештә беренче җинаять эше Кайбыч районында теркәлде. Тикшерү материалы РФ Җинаять кодексының 151.2 маддәсе нигезендә — балигъ булмаганнарны куркыныч гамәлләргә тарту буенча алып барыла.

ЮХИДИ мәгълүматларына караганда, мондый эшләр саны артырга мөмкин. Узган елгы юл-транспорт һәлакәтләре анализы күрсәткәнчә, балигъ булмаганнар катнашында 41 авария теркәлгән. Аларның берсе үлем белән тәмамланган, 40 бала төрле дәрәҗәдәге җәрәхәтләр алган.

Хокук сакчылары билгеләп үткәнчә, бу очракларның күбесендә балаларга мототехника, бигрәк тә питбайклар, әти-әниләр тарафыннан бирелгән. Төп проблемаларның берсе — җәмгыятьтә питбайкларны гади мотоцикл белән бутау. ЮХИДИ хезмәткәрләре аңлатуынча, питбайк һәм эндуро техникасы олы юлларда йөрергә тиеш түгел, ә спорт мәйданчыклары өчен каралган. Шуңа да карамастан, күп очракта алар шәһәр урамнарында, юлларда җилдерә, бу исә авария куркынычын кискен арттыра.

Хокук саклау органнары фикеренчә, балалар катнашындагы һәлакәтләр өчен җаваплылык мәсьәләсе яңача каралырга тиеш. Шуңа күрә ата-аналарга карата җинаять эшләре кузгату практикасы киңәергә мөмкин.