Безне җиңә алмаслар, “брат”!

“Россия – гаиләләр гаиләсе” белем марафонының төп залына, ягъни, Мәскәүдәге “Россия” милли үзәгенә илнең 89 төбәгеннән 160 милләт вәкиле (барлыгы 4 мең кеше) җыелган.

– Шушы залда төрле милләт вәкилләрен бергә күрү соклану хисләре тудыра, – дип башлады үзенең чыгышын Президент Владимир Путин. – Россия үзенең тарихында катлаулы чорлар кичерде. Халыклар ополчениесе Мәскәүне азат итте. Наполеон, Гитлер һөҗүмнәре булды. Аларның гаскәрләрендә дә төрле халыклар бар, ләкин аларның уенда талау һәм басып алу иде. Безнең ил халкын комсызлык түгел, ә  Ватанны-җирне саклау берләштерде. Бүген дә илне яклап көрәш бара, махсус хәрби операциядә катнашучылар бер-берсенә “брат” дип дәшә. Бу җиңелмәс бердәмлекне күрсәтә.

Ил төбәкләре “Россия – гаиләләр гаиләсе” марафонына видеокүперләр белән ялганды. Татарстан Мәскәү белән “Халыклар дуслыгы” йортында элемтәгә чыкты. Бирегә милли-мәдәни мөхтәриятләр, чит илләр студентлары җыелган иде. Татарстанда 175 милләт вәкиле яши, чит илләрдән 22 мең студент белем ала.

– Төрле телләрдә аралашу – үзе бер бәхет. Дус булып яшик! Балалар милли мәдәниятләрне белеп үссен, – диде республиканың яшьләр эшләре буенча министры Азат Кадыйров.

“Халыклар дуслыгы” йорты директоры Тимур Кадыйров, Татарстан Рәисенең милли сәясәтне гамәлгә ашыру буенча идарәсенең баш киңәшчесе Марина Иванова, республиканың “Студентлар лигасы” рәисе Шамил Якупов та дуслыкны һәм бердәмлекне сакларга чакырып сөйләделәр.
Марафонда төрле милләтләрнең үзешчән артистлары чыгыш ясады.