“Бүген васыятьнамә яздым да, иртәгә үләм дип куркырга кирәкми”

«Гаилә» мәчете, Татарстан мөселманнары диния нәзарәте, Татарстанның архив эше буенча дәүләт комитеты, республика Министрлар Кабинетының ЗАГС идарәсе, нотариаль палатасы һәм Бөтендөнья татар конгрессы белән берлектә, «Васыятьнамә – киләсе буыннарга әйтер сүз» конкурсын игълан итә.

– Бүген васыятьнамә яздым да, иртәгә үләм дип куркырга кирәкми, – дип сүзен башлады «Гаилә» мәчете имам-хатыйбы Рөстәм хәзрәт Хәйруллин журналистлар белән очрашуда. – Пәйгамбәребез салләллаһу галәйһи вә сәлләм: “Васыятьнамә язмыйча йокларга ятмагыз”, – дигән. Васыятьнамә ул – балаларыңа һәм оныкларыңа җиткерәсе килгән үгет-нәсыйхәтең. Без муллалар әдәп саклагыз, дус-матур яшәгез дип йөз тапкыр әйтсәк тә, аны кемдер ишетергә, кемдер ишетмәскә мөмкин. Ә әни кеше язып калдырган сүз-нәсыйхәт күпкә үтмлерәк һәм аны искә алган саен, балалары ул васыятьнамәне елый-елый алып караячак, кат-кат аның күчермәсен ясап саклаячаклар. Бәйгенең максаты да васыятьнең мәгънәсен төшендерү.    

Ярыш өч этапта узачак: 1 этап – 2026 елның 15 гыйнварына кадәр конкурс эшләрен җыю; 2 этап – эшләрне жюри тарафыннан бәяләү һәм 3 этап – февраль аенда конкурска йомгак ясау һәм җиңүчеләрне бүләкләү.

– Бәйгегә эшләрне гыйнвар уртасына кадәр кабул итәбез. Озын каникул көннәрендә фикер туплап, аны бер формага салып язу өчен иркен вакыт бу, – дип билгеләп үтте хәзрәт. 

Татарстан Министрлар Кабинетының Гражданлык хәле актларын теркәү идарәсе башлыгы Эльвира Әхмәтова фикеренчә, әлеге проект хәзерге заманда аеруча мөһим. 
– Бу буыннар бәйләнешен ныгыту, гореф-гадәтләребез, йола-традицияләребезне яшь буынга җиткерү чарасы да. Тормыш тәҗрибәсе, тел байлыгы, нәсел тарихы ул ата-анадан мирас булып кала торган матди байлыктан да баерак, – дип белдерде спикер.   

Конкурс түбәндәге номинацияләр буенча үткәрелә: чәчмә формада; шигъри формада һәм видео-васыятьнамә.
Катнашу шартлары: катнашучыларның географиясе һәм яше буенча чикләүләр юк. Материаллар татар телендә булырга тиеш. Чәчмә һәм шигъри формадагы васыятьнамәләр шәхсән языла. Видеога төшерелгән васыятьнамә катнашучының үз нәселе вәкиленеке булырга тиеш. 
Конкурска эшләрне kitaphane.gailya@yandex.ru электрон почтасына юлларга кирәк. Кәгазьдә бастырылган эшләрне Казан шәһәре, Җ.Фәйзи урамы, 2 адресы буенча алып килергә (яки почта аша юлларга) мөмкин.
Эшләр хезмәтләрнең башкарылу үзенчәлеге (иҗади якын килү); башкарылу осталыгы; хезмәтләрнең динилеге һәм сөйләм таләпләренә туры килүенә карап бәяләнәчәк.
Һәр номинация буенча I, II, III урыннар билгеләнәчәк. Төп җиңүчеләрдән тыш өстәмә махсус бүләкләр дә булуы мөмкин.