“Быел бәрәңге елы булачак”: Чистайда республикада бердәнбер бәрәңге эшкәртү заводы ачылды

“Хәзер фри бәрәңгесе кебек әзер продуктлар – модалы тренд. Халык, ризык әзерләүгә вакыт сарыф итмәс өчен, әзерен алуга өстенлек бирә”, – дип белдерде Россия авыл хуҗалыгы министры Оксана Лут Чистайда ачылган “Чисто фри” бәрәңге эшкәртү заводы ачылышында, предприятиенең мөһим проект булуын ассызыклап. 

Аның әйтүенчә, үткән елны бәрәңге эшкәртү базары ун процентка үскән. “Татарстан бәрәңге җитештерү буенча Россиядә барлык секторларда, шул исәптән шәхси ярдәмче хуҗалыкларны да кертеп, икенче урында тора. Республикада мондый предприятие булдыру бик мөһим. Якын киләчәктә бәрәңге эшкәртү буенча яңа проектлар барлыкка килер дип ышанам”, – диде ул.

Сүз уңаеннан, министр быел бәрәңге елы булачак дип тә ышандырды. Фаразларга караганда, бәрәңге уңышы 7,5-7,6 миллион тонна булырга тиеш. Узган ел исә аграрийлар 7,3 миллион тонна җыйган булган.

«Чиста фри» заводы – “Чистополье” холдинг компаниясе проекты.  Ул үткән елны төзелә башлап, җиде ай эчендә сафка бастырылган. Районның 167 кешесенә эш булдырылган. 

Завод ачылышында катнашкан Татарстан Рәисе Рөстәм Миңнеханов белдергәнчә, бәрәңге эшкәртү предприятиесе хыял булган һәм ул чынга ашты.
– «Чистай» холдингында эшнең системалы һәм стратегик яктан дөрес баруына тагын бер мәртәбә инандык. Бәрәңге саклагыч һәм сортларга аеру комплексы төзелгән. Холдинг хезмәткәрләре өчен яңа тораклар булдырылган. Холдингы бүген игенчелек, яшелчәчелек һәм мелиорация өлкәсендә иң заманча һәм инновацион  алымнарны куллунып эшли, – диде ул.

Яңа завод, «Чистополье» компаниясе генераль директоры Наил Залаков әйтүенчә, елына 40 000 тонна бәрәңге эшкәртеп, 18 мең тонна ярымфабрикат чыгарырга җыена.
– Яшелчәчелек белән шөгыльләнәсең икән, аны эшкәртергә дә өйрәнергә кирәклеген аңладык. Корылык булса, кулланучы өчен начар (бәяләр артуны күз уңында тотып әйтүе. – Авт.), ә безнең өчен бу – яхшы. Статистика буенча, илдә бәрәңге уңышы дүрт елга бер тапкыр начар була. Калган уңышлы елларда исә аны эшкәртергә кирәк. Чимал базасы исә бар. Кырлар заводтан ерак түгел урнашкан. Бәрәңгене эшкәртү безгә аның бер өлешен саклауга кадәр сату мөмкинлеген бирәчәк, чөнки саклау – бик зур чыгымнар таләп итәэ Яшелчәне саклауга куйганчы, аны эшкәртеп сатуың мөһим, – дип сөйләде ул журналистларга.

Быел холдингың бәрәңге игү мәйданы 2 мең гектар тәшкил иткән. Аның яртысы фри бәрәңгесенә китә, моның өчен махсус сорт үстерелә. Калган мәйданны товар һәм орлыклык бәрәңге алып тора. Калган бәрәңге сатуга китә. 

Проект үзен акласа, ел ахырына холдинг заводның икенче чиратын төзү турында уйлаячак, диде генераль директор. Әлеге “Чисто фри” заводы республикада бердәнбер бәрәңге эшкәртү заводы булып санала.

Фото: https://rais.tatarstan.ru/