Эләксәң, 45 мең сум штрафка тартыласың һәм «права»сыз каласың

Аларда 4 кеше үлгән, 10 кеше төрле авырлыктагы имгәнүләр алган.

Саба районында 2 гыйнварда “BMW” автомобилен идарә иткән 27 яшьлек ир-ат каршы як полосага килеп чыга һәм “Лада” автомобиленә бәрелә. “Лада” автомобилендәге 65 яшьлек пассажир хатын-кыз шунда ук үлә, ә “Лада”ның 66 яшьлек йөртүчесе хастаханәдә җан бирә. Әлеге автомобильдәге 10 һәм 15 яшьләрдәге пассажирлар да медицина учреждениесенә китерелә. Тикшерү ачыклаганча, авария вакытында  “BMW” автомобилен йөртүче наркотик исереклектә булган.

Спас районында 6 гыйнварда “Лада” автомобилен йөртүче дә исерек хәлдә идарәне югалтып, юл читенә төшеп каплана һәм үлә.

– Казанда бер ир-ат улы туган көнне фаҗигале төстә үлде. Ул сөенеченнән спиртлы эчемлек эчә һәм руль артына утыра. Баласы үсеп җитеп, әтисенең исерек хәлдә автомобильдә бәрелеп үлгәнлеген белгәч, нинди уйлар кичерер?!. Тагын бер гыйбрәтле очракта ике ир аракы эчә, боларга җитмәгәч, автомобильгә утырып, кибеткә китәләр. Юлда автомобиль әйләнеп каплана, ирләрнең берсе кысылып үлә. Туганнары исерекләрнең автомобильгә утыруларын күреп торган, ләкин туктатып калмаганнар. Исерекнең транспорт чарасын идарә итүенә юл куймаска кирәк. “Халык инспекторы” бик әһәмиятле чара. Бу исерекне әләкләү түгел, ә кеше гомерен саклап калу, – диде Татарстан буенча Эчке эшләр министрлыгының Дәүләт автоинспекциясе идарәсе җитәкчесе Рөстәм Гарипов.

Спиртлы эчемлек кулланып транспорт чарасын идарә иткән өчен 45 мең сум штраф һәм транспорт чарасын идарә итү хокукы таныклыгын 1,5 елдан 2 ел вакытка алу каралган. Медицина тикшерүеннән баш тартсаң да шундый ук административ чара күрелә. Транспорт чарасын исерек хәлдә идарә итеп кабат тотылсаң, 3 елга кадәр ирегеңнән дә мәхрүм ителәсең. Хөкем карары нигезендә гаепленең транспорт чарасы конфискацияләнергә дә мөмкин. Узган ел транспорт чарасын исерек хәлдә идарә итеп, икенче мәртәбә тотылган 364 кеше хөкем карары нигезендә җинаять җаваплылыгына тартылган, аларның транспорт чарасы конфискацияләнгән.