Электр өчен яңача түләү кертеләчәк

Татарстанның тарифлар буенча дәүләт комитеты рәисе Александр Груничев белән Россиянең монополиягә каршы федераль хезмәтенең электр энергетикасын көйләү идарәсе җитәкчесе Дмитрий Васильев, “Татар-информ” мәгълүмат агентлыгында үткәрелгән матбугат конференциясендә, электр энергиясенә кагылышлы яңа тарифлар турында сөйләделәр.

Татарстанда 2026 елның 1 гыйнварыннан электр энергиясенә дифференцияле тариф кертелә. Бу күп фатирлы йортларда, шәхси йортларда, дача йортларында яшәүчеләргә кагыла. Электр өчен түләү электрны куллану күләмнәренә бәйле булачак. Ул 3 диапазонга бүленә.

Беренче диапазон – 3900 кВт сәгатькә кадәр. Электр энергиясен аена шушы саннан азрак тоткан-кулланган кешеләр иң түбән тариф нигезендә түли.

Икенче диапазон – 3901 кВт сәгатьтән 6000 кВт сәгатькә кадәр. Монысында тариф беркадәр зуррак.

Өченче диапазон – 6001 кВт сәгатьтән югары. Бирегә электр энергиясен артык күп кулланучылар керә.

Дмитрий Васильев:”Яңача тарифлар кертелү сәбәпле, электр  хисаплагычларын яңага алмаштырырга кирәк түгел. Хисаплагычның куллану срогы тәмамланган булса, ул очракта инде яңа хисаплагыч тиеш”, – диде. Александр Груничев сөйләгәнчә, Россиянең 76 төбәге инде дифференцияле тарифка күчкән, ниндидер аңлашылмаучанлыклар килеп чыкмаган. Белоруссия белгечләре Татарстанга методик ярдәм күрсәтәчәк, Белоруссиядә шушы тариф кулланыла.

Электр энергиясе җитештерүче предприятиеләрнең чыгымнары тарифлар билгеләгәндә исәпкә алыначак.