Эльвира Әхмәтова: «Гаилә — гомер чишмәсе, ЗАГС — аның сакчысы»

Анда гаилә институтын ныгыту, дәүләт хезмәтләрен цифрлаштыру, ЗАГС эшен заман таләпләренә яраклаштыру һәм иң яхшы тәҗрибәләр белән уртаклашу турында фикер алышалар.

Тормышыбызның мөһим вакыйгалары — ЗАГСта

Кеше тормышындагы иң мөһим вакыйгаларның күбесе ЗАГС белән бәйле. Дөньяга килү, гаилә кору, бала туу, исем алыштыру... Кеше гомеренең башыннан ахырына кадәр юридик яктан әһәмиятле вакыйгалар нәкъ менә шушы хезмәт системасында теркәлә.

— ЗАГС органнары гаиләләр тарихын терки һәм буыннар хәтерен саклый. Ел саен республикада 123 мең гражданлык хәлләре актлары төзелә, 535 мең юридик әһәмиятле гамәл башкарыла. Безнең документ фонды — аерым кыйммәткә ия. Һәрбер ЗАГСта актлар 100 ел дәвамында саклана. Гомумән алганда 14 миллион документ исәпләнә. Документларның бер өлеше иске татар телендә — гарәп һәм латин графикасында төзелгән. Бу Татарстан фондын уникаль итә, — дип билгеләп үтте киңәшмәне ачуда Татарстан Рәисе Рөстәм Миңнеханов. 

Цифрлашуның яңа этабы

Россия юстиция министры Константин Чуйченко Татарстаннның киңәшмә уздыру урыны итеп сайлануы очраклы булмавын ассызыклады. Республика дәүләт хезмәтләрен күрсәтү сыйфатын арттыруга, заманча цифрлы алымнар куллануга зур игътибар бирә. Әйтик, дәүләт хезмәтләре порталы аша язылышуга гариза бирүләр 100 процентка якынлаша, дип билгеләп үтте ул. 

Россия юстиция министры сүзләренчә, бүген Россия Бердәм дәүләт гражданлык хәле актлары реестрында 560 миллионнан артык язма саклана. Алар арасында 1926 елдан башлап, архив документлары нигезендә формалаштырылган мәгълүматлар да бар. Бу мәгълүматлар ЗАГС системасында гына кулланылмый. Алар социаль ярдәм чараларын билгеләүдә, салым өлкәсендә, пенсия белән тәэмин итүдә, сәламәтлек саклау системасында һәм башка дәүләт хезмәтләрен күрсәткәндә кирәк, дип искәртте Константин Чуйченко.

Аның сүзләренчә, алга таба дәүләт органнарында инде булган мәгълүматны кәгазь документ белән кабат раслау ихтыяҗы кимиячәк. Уңышлы мисал итеп ул «Бала туу» суперсервисын атады. Аның аша бала тууын теркәгәннән соң, бу мәгълүматлар башка дәүләт хезмәтләрен алу өчен дә кулланыла. Хәзерге вакытта тууларны теркәүнең өчтән береннән артыгы әлеге электрон сервис аша башкарыла. Шул ук вакытта традицион кәгазь документлар да юкка чыкмаячак. 14 яшькә җитмәгән балаларга туу турында кәгазь таныклык мәҗбүри рәвештә биреләчәк.

Тиз, уңайлы һәм ачык

Татарстан Республикасы Премьер-министры урынбасары Ләйлә Фазлыева ЗАГС органнарының бурычы документлар рәсмиләштерү белән генә чикләнмәвен билгеләп үтте.

— Бүген ЗАГСлар — күп тармаклы учреждениеләр. Алар халык белән турыдан-туры эшли, тормышыбызның иң мөһим вакыйгалары белән бәйле мәгълүматны саклый. Шуңа күрә хезмәтләрне системалы, планлы һәм заман таләпләрен исәпкә алып күрсәтү мөһим, — диде ул.

Бу чара төбәкләр өчен бер-берсенең уңышлы тәҗрибәләрен өйрәнү, яңа технологияләрне куллану юлларын эзләүдә мөһим адым булуын ассызыклады ул. Максат — халыкка хезмәтләрне тиз, уңайлы, ачык һәм сыйфатлы итеп күрсәтү.

Гаилә кыйммәтләрен популярлаштыру

Татарстан Республикасы ЗАГС идарәсе җитәкчесе Эльвира Әхмәтова үз чыгышында «Гаилә — гомер чишмәсе» дигән татар мәкален телгә алды.

— Бу сүзләрдә тирән халык хакыйкате ята. Ә яңа тормыш һәм гаилә тууын сакчыл рәвештә теркәүче ЗАГСларны шул чишмәнең сакчылары белән чагыштырырга мөмкин, — диде ул.

Шул ук вакытта ЗАГСларның эше гаиләнең тормышындагы мөһим вакыйгаларны теркәүдән тыш та бик күп эшләр башкаруын ассызыклады ул. Республикада гаилә кыйммәтләрен популярлаштыруга юнәлтелгән «Гаилә атнасы», «Гаилә автобусы: традицияләр — юлга!» кебек проектлар гамәлгә ашырыла. «Гаилә автобусы» проекты кысаларында психологлар, табиблар, репродуктологлар, медиаторлар, гаилә юристлары, социаль яклау һәм Социаль фонд белгечләре районнарга барып, гаиләләргә консультацияләр биргән.

Яшь буынны гаилә тормышына әзерләү дә аерым юнәлеш булып тора. Татарстан ЗАГСлары мәктәп эскәмиясеннән үк гаилә һәм ата-ана булуга уңай мөнәсәбәт формалаштыруга юнәлтелгән «Гаилә белеме дәресләре» һәм «Яшь гаилә мәктәбе» проектларын үстерә.

Киләчәк әниләр өчен дә төрле чаралар үткәрелә. Алар арасында психологлар, педиатрлар, акушер-гинекологлар катнашындагы «Әнинең чәчәк атуы: бала табудан гармониягә кадәр» форумы оештырыла. Мондый очрашулар йөклелек чорын аңлы һәм әзерлекле рәвештә узарга ярдәм итә.

ЗАГСлар гаиләдә килеп чыккан катлаулы хәлләрне хәл итүгә дә үз өлешен кертә. «Ышаныч» психологик үзәге белән берлектә ЗАГС бүлекләрендә бушлай психологик консультацияләр оештырыла. «Бәхетле гаилә мәктәбе» программасында булачак яшь гаиләләргә үзара мөнәсәбәтләрне кору күнекмәләре өйрәтелә. Шулай ук аерылышу чигенә җиткән гаиләләр белән эшләү өчен медиатив технологияләрне куллану буенча «Идел буе медиаторлар лигасы» белән хезмәттәшлек турында килешү төзелгән.