Эшең бетмәсә 15 минутта, акчаңны саный башла

Казанда мәктәпләр, балалар бакчалары һәм дәваханәләр янындагы машиналар куеп тору мәйданчыкларында (парковка) түләүсез вакыт 15 минуттан 30 минутка кадәр озайтыла.

– Сәламәтлек саклау һәм мәгариф учреждениеләре янындагы муниципаль парковкаларда апрель аеннан башлап машина куеп торуның түләүсез вакыты 30 минутка җиткереләчәк, – дип хәбәр итте шәһәр Башкарма комитеты җитәкчесе урынбасары Илдар Шакиров “эшлекле дүшәмбе” киңәшмәсендә.
Проект сынау рәвешендә 22 муниципаль парковкада гамәлгә ашырыла, ул 490 машина урынны колачлый. Мондый, ягъни, 30 минут бушлай файдалану мәйданчыклары зәңгәр төстәге сызык белән аерымлана, сары төстәге мәгълүмат тактасы куела.

Башкалада 8 721 машина урынга исәпләнелгән 197 муниципаль парковка  оештырылган. Мәйданчыклар нәтиҗәле кулланылсын өчен төрле тариф кертелгән. Ул сәгатенә 30, 50, 70, 100 һәм 130 сум түләүләрне тәшкил итә. Социаль учреждениеләр янында булмаган муниципаль парковкаларда беренче 15 минут кына бушлай. Атнаның эш көннәрендә генә түләү алына, бу – 8.00 сәгатьтән 19.00 сәгатькә кадәр. 19.00 сәгатьтән 8.00 сәгатькә кадәр, шулай ук ял һәм бәйрәм көннәрендә түләү алынмый.

Хәзер пик сәгатьләрендә (Пушкин, Малая Красная, Кави Нәҗми, Муса Җәлил, Уң як Болак, Сул як Болак, Спартак, Һади Такташ, Айдинов, Япеев, Профсоюзлар һәм башка урамнарда) 16 мәйданчык машиналар белән 95-100 процентка тула. 

– Ләкин, шәһәрнең Толстой һәм Әхтямов урамнарындагы 2 парковканың машиналар белән тулыланышы 30 проценттан да азрак. Шунлыктан, әлеге урамнардагы парковкаларда 24 марттан башлап түләү тарифында бәяне “арттыру” һәм “киметү” алымы кулланылачак. Үзгәрешле тариф 1 213 машина урынына кагылачак, – диде Илдар Шакиров.

Казанда бүгенгә 485 мең автомобиль теркәлгән. Автомобильләшү дәрәҗәсендә караганда, 1 мең кешегә 368 автомобиль туры килә.