Эт асраучыларны һәм хуҗасыз җәнлекләрне «эт кебек күзәтеп тору» кирәк

Ләкин шәһәр һәм авыл җирлекләрендә тагын меңләгән эт һәм мәче үз иркендә йөри. Эт барында хәтәр бар шул. Яшел Үзән районындагы Васильево бистәсендә этләр өере талаган 9 яшьлек Варвара Блохина 18 декабрьдә Балалар республика клиника хастаханәсендә (ДРКБ) вафат булды. Казанның Клыки бистәсендә дә быел этләр бер хатын-кызны талап үтерде.

– Россия законнары хуҗасыз этләрне юк итүне тыя. Фаҗигале хәлләрдән соң Татарстанда хуҗасыз этләргә карата өстәмә чаралар күрү хокукы бирә торган яңа закон проекты әзерләнә, аңа үзгәрешләр кертелә, – дип хәбәр итте Татарстан Республикасы Министрлар кабинетының баш ветеринария идарәсе җитәкчесе урынбасары Илшат Гыйниятуллин “Татар-информ” мәгълүмат агентлыгында үткәрелгән матбугат конференциясендә.

Республикада быел 10 мең хуҗасыз этне тотып алып, приютка урнаштыру планлаштырылган. Бүгенгә 9 мең эт тотылган. Бер этне тоту, стирильләштерү чараларына 6 мең сум чамасы акча китә. Кешеләрне тешләгән, усал этләр “йоклатыла”, ә тыныч этләр кабат иреккә җибәрелә. Быел хуҗасыз этләр белән эшләүгә 80 миллион сум бирелгән, 2026 елга 102 миллион сум тәгаенләнгән.

– Күп фатирлы йортның баскыч төбендә, шулай ук ишегалдында эт асрау тыела. Кеше үзенең эте белән йөрергә чыкканда эт борынчаклы булырга һәм бауда тотып барылырга тиеш. Эт белән кешеләр янына килгәндә дә борынчак таләп ителә. Кагыйдә бозуларны халык үзе дә күзәтеп торсын иде. Фотога яки видеога төшереп, хакимият һәм хокук саклау органнарына җибәрергә кирәк. Эт борынчаксыз йөртелсә, чип ясалмаган һәм теркәү узмаган булса штраф салына, – диде Татарстан Республикасы Министрлар кабинетының баш ветеринария идарәсенең хокук бүлеге җитәкчесе Рөстәм Шәяхмәтов.

Кыйнаганнан һәм җәберләнгәннән соң эт үлсә яки имгәнсә, шушы эштә гаепле кеше Россия Федерациясе Җинаятьләр кодексының 245нче матдәсе нигезендә җавапка тартыла. Бу 80 мең сум штраф, мәҗбүри эшләргә тарту яки 1 елдан 3 елга кадәр иректән мәхрүм ителү җәзалары белән яный. Моны баласын югалткан Блохиннар гаиләсенә аңлатып кара син?!.