Ял көннәрендә ремонт ясау ярыймы: канун ни ди, күршеләр белән ничек килешергә?

Һәм алар ремонт турында менә нәрсә сөйлиләр.

Ял һәм бәйрәмнәрдә мондый эшләр катгый тыелган. Шимбә, якшәмбе һәм рәсми эш көне булмаган көннәр – тынлык вакыты (гәрчә күп төбәкләрдә шимбә эш көненә тиңләштерелгән булса да). Бу көннәрдә шау-шулы ремонт эшләре барлык төбәкләрдә дә диярлек тулысынча тыелган.

Эш көннәрендәге мөмкинлек «иртәдән кичкә кадәр ярый» дигәнне аңлатмый. Закон катгый вакыт кысаларын билгели. Мәсәлән, Мәскәүдә 9:00дән 19:00гә кадәр генә тавыш чыгарырга рөхсәт ителә.

«Тихий час» бар. Мәҗбүри көндәлек тәнәфес, 13:00дән 15:00гә кадәр. Бу вакыт балалар һәм башка йортта яшәүчеләрнең ялын күзалланып сайланган. 
«Шау-шу» булып нәрсә санала? Бу көчле музыка гына түгел. Тыюга перфоратор, дрель, болгарка белән эшләү, шулай ук стеналарны штроблау, бүлмә диварларын җимерү һәм башка төрле демонтаж керә. Мөһим нюанс: сезнең ремонт үткәрүгә күршеләрнең ризалыгы законны гамәлдән чыгармый. Хәтта бөтен подъезд сезгә якшәмбе көнне эшләргә рөхсәт итсә дә, формаль яктан бу хокук бозу булып калачак.

Тынычлык турындагы законны бозу – ачуланышу өчен сәбәп кенә түгел. Бу конкрет нәтиҗәләре булган административ хокук бозу. Штраф күләме төбәккә бәйле һәм гадәттә физик затлар өчен 1000-5000 сумны тәшкил итә. Кабат хокук бозулар өчен сумма сизелерлек арта.

Интернетта үз төбәгегезнең административ хокук бозулар турындагы кодексын табу өчен унбиш минут сарыф итегез. Анда кайчан тавыш чыгарырга мөмкин, ә кайчан - катгый рәвештә ярамый дигән төгәл вакыт күрсәтелгән.

«Шау-шулы» эш графигы төзегез. Барлык бурычларны тавышлы (демонтаж, бораулау) һәм тыныч (шпаклевка, буяу, мебель җыю) эшләргә бүлегез. Иң шау-шулы этапларны эш көннәренең рөхсәт ителгән сәгатьләренә сыйдырырга тырышыгыз.

Эш башланырга берничә көн кала хәбәрне өйдәге гомуми чатка языгыз яки белдерүне лифтка элеп куегыз. Мәсәлән: «10-15 март көннәрендә 78 нче номерлы фатирда ремонт ясыйбыз. Тавышлы эшләр эш көннәрендә 10:00 - 18:00 сәгатьтә тәнәфес белән үткәреләчәк. Ял көннәрендә – бары тик тыныч эшләр. Борчыганыбыз өчен алдан ук гафу үтенәбез!».

Күршегездә ремонт булса, нишләргә?
Әгәр дә сез конфликтның икенче ягында булсагыз, тыныч һәм эзлекле эш итегез:
- Агрессиясез сөйләшү. «Мин ремонт кирәклеген аңлыйм, әмма безнең бала көндез йоклый, әйдәгез иң шау-шулы вакытны килештерик?» Бу кычкырулардан яхшырак эшли.
- Ярдәм. Әгәр шәхси диалог ярдәм итмәсә, башка күршеләр белән сөйләшегез. Коллектив үтенеч яки шикаять зуррак әһәмияткә ия.
- Полиция чакырту. Ахыр чиктәге, ләкин законлы чара. Әгәр шау-шу төгәл тыелган вакытта (мәсәлән, якшәмбе) дәвам итсә, аны тавыш һәм вакыт белән видеога теркәгез һәм шалтыратыгыз. 
- Роспотребнадзор. Озакка сузылган конфликтлар өчен-тавыш дәрәҗәсен үлчәү турында гариза язарга мөмкин.

Әйе, ремонт диварның ныклыгын гына түгел, кеше мөнәсәбәтләрен дә тикшерә. Канун чикләнеше ачык күренә: ял көннәре тынлык өчен каралган. Көнкүреш компромиссы әңгәмәгә әзерлектән һәм гади гамәлләрдән туа: белдерүне вакытында чатка җибәрергә, шимбә көнне перфораторны сүндерергә һәм иртәгә ремонт сезнең күршегездә башланырга мөмкинлеген истә тотарга.

Лилия Яфизова